相信有唔少媽咪都有呢個經驗，就係無論買幾多玩具都好，小朋友最鍾意玩嘅都一定唔係屬於佢嘅嘢，好似屋企入面嘅筲箕、鎖匙、遙控器，出到街嘅刀叉、牙籤筒，通通都有可能成為佢哋嘅目標，而且絕對係玩極唔厭，愛不釋手嗰種；真心想問：「咁其實仲使唔使買玩具呢！？」
即使係偶爾被寵幸嘅玩具，佢嘅玩法都係絕對創新，超乎你想像；有時候望住個仔，都不禁諗......其實呢個小朋友係嚟自宇宙邊個地方？呢個物種，雖則身體結構係同我哋大人一模一樣，但佢哋嘅腦袋仿彿點睇都比我哋大，意想不到嘅舉動同創意，到底係喺邊樹嚟？點解一樣物件，佢會諗到咁多玩法？而我哋就變得咁單一。
乜我哋唔係應該比小朋友認知更多咩？咁點解佢嘅視野總係闊過我？莫非認知反而令我哋個世界愈嚟愈細？定係我哋將個Comfort zone愈畫愈細，再無勇氣跳出去？
正因為有呢個諗法，所以經常提醒自己要習慣，唔好第一時間就覺得小朋友唔啱、唔正確，連玩都同佢講唔係咁玩，要學習從佢角度出發，由佢眼晴看世界，由佢帶我去尋找更多不可能嘅答案，或早已遺失嘅美好......
當然呢個諗法唔可以套用任何事，當接觸有規則嘅遊戲時，都係要規則；至於，到底要點樣先可以取得平衡，大概係父母終生要學習嘅課題！
