有媽媽喺討論區呻，一啲老人家或者親戚好鐘意問小朋友肯唔肯送佢心愛嘅嘢畀佢，如果小朋友唔肯，就話佢自私，更甚嘅仲會嘗試喺小朋友手上搶返來！
喺呢個Moment，Juicy媽要爆了，我諗唔少小朋友都畀人咁樣「撚化」過！點解啲人會覺得好好玩呢？不如我叫你送個銀包畀我，睇吓你又肯唔肯？唔知點解硬係有啲人，好鐘意睇人哋個B嬲或者整喊人，你就玩得開心啦，難為要氹返小朋友嗰個————即係我啊！
唔好以為小朋友細細個就無意識，佢地如果畀人搶野都會唔開心架，一個唔小心仲會造成童年陰影，有JM仲記得佢以前細個畀人蝦:「姨媽畀咗張閃卡我，得我有，妹無，妹想要，我唔肯，爸就打到我頭流血教訓我要分享，妹玩咗一陣就厭，將閃卡掉咗落地，爸媽問妹係咪唔要，妹話唔要，我諗住會還返比我啦，點知係掉咗落垃圾桶，都唔想我拎返件野。」聽到都覺得心痛！
有啲老人家仲會嚇個細路，最後咪又係要媽媽善後：「細女滿月，99係咁同我大女講，拎走你個妹返屋企，講n次，我大女狂喊，其實我覺得好煩，次次搞到細路喊收場，又要我善後... 」
有人會話：「我同小朋友玩吓之嘛！」聽到我把幾火，你咁鐘意咁玩不如去超市問職員可唔可以送呢樣貨畀你，睇吓佢肯唔肯同你玩（笑）。
點叫為之「同小朋友玩」呢？「我攞走你部iPhone， 要你錫我一啖先俾返你，你仲要唔好嬲喎！否則係你「唔玩得」！！知唔知乜係尊重？」唔少媽媽都認同，要個小朋友都覺得開心，先叫一齊玩，只有你一個大蝦細，搶人嘢，邊度係「玩」呢？
