聖誕節快將來到，不少小朋友都正期待聖誕老人會送禮物給他們，但所謂的「聖誕老人」其實只是父母扮演，希望讓孩子保留幻想，但這個「幻想」到底要到子女甚麼歲數才適宜打破？有港媽於網上討論區發文指，兒子從小就相信世上有聖誕老人，只要乖便會收到聖誕老人的禮物，但日前奶奶到家裏作客時，竟突然將真相說穿，十分直白地指出「呢個世界邊有聖誕老人㗎？」，令兒子當場失望爆喊，亦令港媽非常不滿。
該名港媽於香港討論區以「奶奶同阿仔講呢個世界冇聖誕老人」為題發文表示，臨近聖誕節，她特意在家中弄了少許佈置營造節目氣氛，而兒子亦畫了兩張聖誕卡，其中一張是寫給聖誕老人，告訴他今年聖誕想收到甚麼聖誕禮物。她沒有寄出，而是向兒子稱掛在聖誕樹上，聖誕老人就會見到。
港媽表示，兒子每逢12月都會很乖，因為他相信只有乖的小朋友才會收到聖誕老人送的禮物。不過日前奶奶前來探望，看到聖誕樹上孫兒畫的聖誕卡，竟十分直接地指出「呢個世界邊有聖誕老人㗎？你老母呃你㗎咋！聖誕老人咪你爸爸囉，所以收到聖誕禮物唔好多謝聖誕老人，你應該要多謝爸爸」。
港媽當時正在廚房準備茶水，聽到奶奶說第1句時已「9秒9」衝去客廳，但仍趕不及阻止奶奶說完整句話。兒子聽到後幻想破滅，「爆喊」問她「係咪真㗎？真係冇聖誕老人？真係呃佢？」。港媽見事情已無法挽回，唯有說出真相，兒子得知世上沒有聖誕老人的真相後非常傷心，表示不需要爸爸媽媽送聖誕禮物給他，他只想收到聖誕老人送的禮物。而奶奶則在旁說風涼話，批評她「你唔講大話呃個仔就唔會攪到而家咁。」
港媽無奈稱，她只是想留一點童真給兒子，不解奶奶為何要這麼早告知真相，「仲要講到我係壞人要講大話呃個仔咁樣，我夠知佢第時大個會知道冇聖誕老人送禮物畀佢，真係有必要係個孫6歲都未夠嘅時候咁樣破壞佢嘅童年咩？」
帖文一出即引起網民熱烈討論，有網民認同樓主奶奶破壞童真，「點解要咁樣傷害小朋友呀」，不過亦有不少人認為奶奶沒做錯，「講事實有咩錯？」、「奶奶對喎，最重要應該係多謝阿爸，妳個仔6歲妳唔教佢對阿爸感恩，反而怕佢無童真？久而久之，佢大個咗對父母畀佢一切的嘢就會覺得理所當然，咁受保護真係溫室長大囉」、「我鍾意嗰句『應該多謝阿爸，唔係多謝聖誕老人』，呢個愛的教育更有意義。」
