小編好耐無見大家喇，唔經唔覺皮皮已經出世咗2個月！我嘅坐月生活都完結咗，而家每日就係過緊我嘅湊仔生活，感覺十分新鮮，每一日都係一個挑戰！
不過除咗做咗人媽媽之後嘅身心同生活有變化之外，仲有一樣嘢變化好大嘅，就係屋企嘅環境喇，四周圍每個角落都幾乎被BB嘢佔據住！估唔到阿皮人仔細細，但要用嘅空間要係咁多！
所以今次就想同大家嚟個Home Tour，畀大家睇下平日照顧阿皮日常空間究竟係點分佈，等孕媽媽們都可以趁早諗下屋企可以點佈置，以下呢啲都係重點會介紹嘅區域：
1.睡眠區
初生BB大部分嘅時間都係瞓覺，所以我同皮爸都認為睡眠區係最重要嘅地方， 而一張好嘅床仔亦都係不可缺少嘅必備物品！
我哋當初揀床仔都揀咗好耐，因為想放張BB床喺主人房入面，等阿皮同我哋一齊瞓，方便隨時都可以觀察同照顧住佢，但礙於我哋房嘅空間比較細，所以揀床仔都有啲條件限制，好彩最後遇到4moms® mamaRoo sleep® bassinet , 完全係解決到我哋新手爸媽嘅煩惱！
首先我最鐘意呢張搖床係夠慳位，畢竟我嘅揀床仔嘅首要原則係要放得落房，仲可以喺必要時拎到出客廳方便大人照顧BB，而4moms呢張床嘅尺寸就正正符合我嘅要求，整張床連腳的長寬高為34"X24"X39"，比市面上的大床款的更細小，不佔地方。另外床仔亦好易安裝，基本上只需裝上4隻床腳以及插電，皮爸只用上5分鐘就完成！
第二個大優點就係安撫bb，由於佢係一張電動搖床，所以同一般普通嘅床唔一樣，附有5種搖動方式以及速度，例如乘車、袋鼠跳、蕩鞦韆、搖搖哄睡、 波浪，有助BB安穩入睡，保持良好嘅睡眠質素，平穩而舒適嘅搖擺動作就好似被爸爸媽媽抱住咁！
另外仲有4種白噪音可以播畀BB聽，包括風扇聲、雨聲、海浪聲及噓聲，皮皮最鐘意聽就係聽住雨聲，再加埋佢嘅震動功能，每次一路搖一路聽，好嘆咁好快瞓著，係一個好正嘅哄睡神器，令到阿媽我都可以多啲時間休息，有覺好瞓！
除此次外，張床仔仲可以連結去藍芽，透過 4moms個手機App控制所有功能，方便爸爸媽媽隨時隨地都可以調較到。同埋仲個計時功能，可以接需要揀返，幫阿皮訂立固定的睡眠習慣。
最後仲有一個幾大嘅優點就係張床可以調節高度，可以較到同大人張床一樣高度，我瞓低望過去阿皮張床係水平視覺，加埋側邊個網係高清網，我就可以隨時隨地觀察佢嘅一舉一動，就算夜晚都唔使專登走落床！
2.膳食及護理區
另一個成日都會用到嘅地方就係餵奶換片區喇，畢竟初生BB唔係食奶就係瞓覺。我哋就揀咗全屋最正中心嘅地方嚟做佈置，用一個大嘅層板置物架去放哂照顧阿皮會用到嘅用品，都真係花咗唔少心機時間去執㗎！因為本身呢個位係擺哂我出街嘅飾物同埋我同皮爸最愛嘅酒，而家所有嘢都要全部讓路，變成最主要解決阿皮生理需要嘅地方，改造完真係超級方便就手！
上層係餵奶區，分別擺咗烘乾消毒機、暖奶機、熱水壺，荒廢咗嘅奶粉一罐，仲有一個膠箱放消毒好嘅奶樽用具，確保乾淨衛生！
下層係換片沖涼區，一個兜放換片用嘅嘢，包括尿片、清潔棉、patpat膏同紙巾；另一個兜就放沖涼用嘅嘢，包括棉花球、抹咀濕棉、紗巾、面霜、身體霜、棉花棒等，側邊仲有多個兜放唔常用嘅嘢。
每次一換片沖涼就成個兜拎，真係會快好多！
3.泵奶區
最後就係我成日都會用到嘅泵奶區喇，每一日都有好多個20分鐘坐喺度泵奶，當然要打造返一個私人小角落畀自己，一切以方便就手舒服為大原則！
有個小貼士提下大家就係最好奶泵機附近有插頭，咁每次用完都可以即刻叉電！
買多咗部消毒烘乾機係用嚟消毒奶泵嘅，每次坐埋去就拎得！
仲有呢個Ivy推薦好好用嘅免提泵奶胸圍，令我可以解放雙手做乜都得！
另外我嘅小建議係可以擺壺水或代茶喺度，20分鐘泵奶時間唔好浪費，休息下飲啖嘢補充多啲水份，奶水都會充足啲！
如果大家想傾下孕期心事或者有其他BB問題，歡迎隨時FB/IG DM我哋一齊傾下計！
BK小編Salome 上
-------------------------------------
記得Like同Follow埋我哋嘅FB IG！
IVY 丨
Facebook: 小屁孩翹翹－QQ
Instagram: why.so.qq
SALOME丨
Facebook: Salome 皮媽咪
Instagram: salome.peimame
【跟住小編做媽咪】
全港首個懷孕實況全記錄！
CLS YouTube Channel🎥 Baby Kingdom
