琴晚飲茶時，見到隔離檯有位婆婆係咁同個後生媽媽講：同BB著返件外套喇，一陣冷親呀，一陣又感冒又點點點點點架喇。八卦望一望個小朋友，嗯，個額頭仔係少少汗嘅。
呢一幕簡直喚起我萬馬奔騰嘅悲痛回憶。仲記得啱啱生B時，當然一屋人都好興奮，然後外婆一句「好凍呀同佢加件被仔喇」、嫲嫲一句「咁唔夠暖架著多件背心啦」。真係好想大叫一句STOP！我個小朋友唔係糭囉，OK？！包到咁你哋唔覺得唔正常咩？
其實熱唔熱、凍唔凍呢啲真係好個人。即係如果老人家怕凍，又唔可以直接將感觀代入BB度。最可行都係實時摸下BB頸仔同背脊，感受下佢體溫啦。仲有，其實，熱都辛苦架，焗親都一樣會病！
唔明點解有啲長輩鍾意做過氣先知或馬後炮，斷言「今次BB流呢滴鼻水係因為上星期一你唔聽我講幫佢加件衫！」然後再加句：「我都話架喇！」
真係好想好似大小姐咁講句：「Shut Up！」做人媽媽已經好多嘢諗、好大壓力，有時真係好怕身邊人嘅負面說話，簡單啲嚟講——出少句聲就最好！為BB好大家都明，但真係唔使太過份，有邊個呀媽唔想照顧得BB妥妥當當？
