「全職湊仔？你就好啦！老公賺咁多，可以Un un腳做少奶奶！」講到做全職媽媽Full Time Mum（FTM），大家多數第一時間聯想到咩？
以前全職媽媽叫家庭主婦，而家叫FTM，但不變嘅係，個個都以為你好得閒，可以好似闊太咁日日High Tea，但其實FTM嘅辛酸又有幾多人真心理解？
1. 24小時On Call，辛苦過返工
返工的話起碼都有樣嘢叫「Office Hour」，Lunchtime、斟水、去廁所等都仲叫做有啲喘息空間，但全職媽媽係每日24小時無間斷工作！
以為小朋友返學、午睡就代表媽媽有得休息？錯喇！因為嗰短短幾個鐘反而要以光速去處理家頭細務、買餸煮飯等瑣碎事，而且手腳慢啲都唔得，因為阿仔阿女話咁快就放學／瞓醒！所以，全職媽媽根本係On Call 足足365日！
2. 小朋友有咩事都係你責任
唔知點解，啲親朋戚友嘅邏輯係：既然你全職負責湊小朋友，咁小朋友有咩頭暈身㷫，就一定係因為你照顧得唔好，係你嘅問題！
討論區有人話「如果有人屙屎唔出，都係因為你冇切好水果，獻給主子」，正正就係全職媽媽會遭受到嘅指控！但其實，小朋友間唔時頭暈身㷫係好正常，佢唔舒服，作為媽媽嘅係最心痛嗰個，旁觀者憑咩走出嚟指責FTM！？
3. 長期容易燥底
返工都有同事可以傾吓偈，但FTM係長期都要獨自承受壓力，因為老公同朋友都未必能夠理解你，如果同佢哋呻，佢哋會話：你已經唔使返工好得閒架喇噃！
唉，有壓力都無從宣洩，真係好容易湊細路湊到抑鬱、躁鬱！
4. 忍受他人閒言閒語
喺香港呢個金錢至上嘅社會，唔返工、冇收入就等於死罪，特別係老一輩，好多時一聽到你話辭工就會好大反應！
討論區有人話，做FTM預咗要成日聽到男家嗰邊講好多難聽嘅說話：「會被人睇賤你，以為你唔肯去返工賺錢，懶，要做少奶奶。男家睇死你，唔尊重你，當你寄生蟲。一生的財政依靠在一個男人身上。」
5. 犧牲上位機會，冇安全感
唔少媽媽喺職場上都撈得唔錯，尤其係上緊位嘅JM，毅然要轉做FTM其實等同放棄多年來嘅努力，將來出返社會又要由頭開始過，雖然話為咗仔女無所畏懼，但內心間唔時都會湧起不安嘅感覺……
大家對「全職媽媽」嘅印象又係點呢？Click入嚟一齊傾傾！
