對於新手父母嚟講「學校家長group」都算係其中一樣從未接觸過嘅新鮮事，諗返起自己讀書年代，父母或者照顧者最多咪喺等放學、等放飯嘅時候，同隔離班陳小明個阿媽傾多兩句，要有緊密溝通嘅都真係比較少，但鏡頭一轉，嚟到2020年，隨住科技發達，溝通方法變得更多、更容易，先唔好講係好定壞，單單要諗到底應該點樣同其他家長相處先係「剛剛好」都已經夠苦惱，太熱情又怕嚇親人，太cool又怕比人覺得「扮晒嘢」，有時真係有咩資訊錯過咗都求救無門。
無論係為咗方便溝通或者聯誼，甚至本著唔執輸心態，有唔少家長都會加入學校班別、級別嘅家長學校，而最近就JM分享「學校家長group」入面嘅難頂事件簿，對於家長「唔識謙虛」嘅行為甚為反感：「大家素未謀面，見都未見過。有啲家長好鍾意喺學校群讚自己小朋友。」仲問JM們有無聽過啲比以下更誇張嘅事：
- 要考級十，沒有難度。
- 學校上堂嘅嘢我小朋友全部識晒。
- 我仔話係咁咁咁，佢唔會錯。
- 我哋冇教過，但小朋友自己一拎起書就識讀啲字。(2歲，天才？)
- 我哋冇教過，小朋友識背唐詩。（3歲，唔通日常生活用唐詩對話？)
討論區熱話：加入學校群組，發現原來有好多家長都...
討論區熱話：加入學校群組，發現原來有好多家長都...
「天外有天」有麝自然香
有網友就話家長們分享心態有幾種，有啲源於擔心小朋友進度，所以咪講出嚟比較下，當係得個知字，但有啲就純粹曬命要鬥叻，而幼稚園更加係比拼高鋒期，閒閒地「一街都係天才兒童！」，但呢種曬命分享確實唔太討好，大部份家長都覺得應該教導小朋友「天外有天」嘅道理，同時亦認為真正叻嘅家長同小朋友，反而顯得格外謙虛：「機緣巧合下，尋日同一個今屆狀元爸爸傾計，我話你小朋友除咗努力，天資一定很高。對方斬釘截鐵話佢小朋友資質一般，但父母做到畀佢哋無後顧之憂嘅支援；我諗呢啲家長質素，高下立見。」
除咗「曬命一族」，JM們認為仲有一種家長係相當討厭：「嗰啲一開始就話自己係新手家長乜都唔識，只識問人，依家多數都係生一個，邊個唔係新手，求其Google 吓都搵到資料，懶就懶。不過可能佢講嘅新手係指『伸手』咁解。」
Juciy媽成日都講「一樣米養百樣人」，做人又難免有比較，之但係凡事都係適可而止就最好，見到人比自己優異，可以轉化成進步動力，但同時亦要了解每個人都有獨特之處，過份比較無論對家長或者小朋友都會造成壓力；至於家長相處之道，最緊要都係做好自己，見到其他人行為唔啱心水咪當作警戒，提醒自己千祈唔好犯同樣嘅錯，而其實相識都總算係緣份，啱傾咪講多兩句，唔啱傾咪當笑話開心Share下囉！
