今日去咗動物園，
你見到有小朋友坐住架大笨象手推車，
你話你都想坐，
我話如果見到有得租就有得坐，
跟住繼續參觀。
去到可以租車嘅地點，
一如所料車已經全部租哂出去，
你好合作冇扭計，
然後繼續參觀。
睇咗一陣街頭表演，
你話想再去睇吓有冇得租，
我話好，
因為其實我都好想租到畀你坐。
今次見到有一架，
只係遲來一步，
睇住佢畀人租走咗。
你好失望，
但係你好犀利，
仍然冇扭計。
我共鳴到你嘅失望，
所以就抱住你繼續參觀。
到已經睇哂你想睇嘅動物，
正打算走之際，
估唔到你再提出想去睇吓有冇得租車。
我地走喇喎，
仲睇？唔係呀話！？
我心諗。
口嗰句係，
好啦去睇多最後一次啦，
如果冇就走架喇。
結果離遠見到有兩架吉車，
媽媽一個箭步標去睇，
你緊隨其後，
我施施然跟尾。
埋到去，
見到有兩個大人兩個小朋友喺度，
我地一家三口企定定喺度，
等候職員宣判。
望住你嗰個超期待但係又唔敢咁快開心住嘅樣，
真係我都緊張埋一份。
最後發現嗰4個係一家人租一架車。
我想攞錢出嚟畀嘅同時，
你已經自己爬緊上車。
從你上車一路講講講講講到落車嘅狀態，
完全感受到你坐到呢架車係有幾咁開心。
爸爸都好好好開心，
不過唔係因為呢架車，
而係喺嘗試租呢架車嘅呢四個幾鐘頭入面，
你表現出嚟嘅忍耐同自制，
仲有嗰份單純地唔放棄嘅堅持，
爸爸喺隔離睇住，
真心汗顏。
遇，
有你真好。
