上星期本來想帶你去沙灘玩，
喺屋企執嘢換衫嘅時候，
天氣幾好架。
到臨出發嗰吓望出窗，
見到好多條白色線，
仲又行雷又剩。。
見到咁嘅情況你當然勁失望，
因為其實我地講咗去沙灘玩好耐。
喺房入面嘅你有啲脾氣，
我同媽媽於是選擇畀啲空間你冷靜一下，
然後我地行咗出廳。
等咗一陣你冇哂聲，
媽媽入嚟睇吓你點，
發現你托住個頭仔望住個天，
原來你同天父祈緊禱。
望住你行返出嚟嗰個失落樣，
我話：
「我地繼續去啦！想做就要堅持！」
「去到沙灘如果仲落雨我地就等一陣！」
「如果真係唔停雨先返屋企！」
唔知點解，
我講緊嘅時候自己心入面覺得好震撼，
其實都只係一啲已經講到爛嘅道理。
或許，
呢個幾月嚟，
實在發生咗太多令人想放棄嘅事。
／
到我地出門口嘅時候你好興奮，
然後我怕你去到沙灘萬一發現都係冇得玩，
會失望到唔知點算，
於是我又再帶一帶頭盔：
「拿唔一定去到架，
萬一唔停雨就要返屋企架喇ok？」
我心入面其實都打定輸數，
咪當遊個車河囉。
喺車上面你瞓著咗，
而我同媽媽就親眼睇住個天，
由大雨到細雨到唔再落雨。
叫醒你，
你見到冇雨嗰吓開心到一個點。
「我頭先同天父祈咗禱吖嘛！！」
冇錯係呀仔。
跟住我地仲喺沙灘曬足兩個幾鐘tim。
／
感謝天父，
不斷用你去提醒我，
要有信心，
要有盼望，
要堅持！
呢個提醒真係非常非常非常重要。
