不少僱主曾反映外傭外出購物時「打斧頭」，故意報大數騙取更多買餸錢，令僱主憤怒又頭痛。但有僱主日前在社交媒體分享，指家中外傭會用簿仔記帳，更會用夾子把每一張收據收好，以便僱主查閱，細心又有條理的做法令僱主不禁感嘆姐姐有潛質做會計師！
該名僱主日前（12日）在Facebook專頁「表揚好姐姐開心分享區」發文，大讚家中外傭姐姐有潛質做會計，並分享了姐姐所做的帳目表。從照片可見，姐姐在簿上清楚列明每一筆消費，由消費日期、購買物品、領取金額、花費金額及餘額全部記得一清二楚，更精準至小數位。此外，姐姐亦有用夾子將收據夾好放在其中，並在封面寫上總數，方便僱主核對。
記錄中有部分顯示為負數，僱主解釋是姐姐先行墊支的金額，「因為我長期無現金係身，佢又無怨言。」她表示對於姐姐所做的開支記錄，自己從未認真計算過，對姐姐十分放心，「其實我都無認真篤過計數機，求其拆散佢扮計左。而婆婆同我都會買餸所以佢帳面條數咁細。」
帖文引起不少僱主留言，紛紛分享自己家中的處理方法，「我姐姐只會把單全部俾我自己計，我每個星期俾600……」、「我會俾佢用八達通，大家慳啲時間，佢要照俾單我」、「如果姐姐幫我出左錢，我會即日憑單俾番錢佢。因為我唔想欠佢錢」、「我姐姐賬面仲細，我都係每一星期比200左右佢買新鮮嘢，其他唔急用嘅嘢，都係我鍾意自己揀自己買多，所以我都係懶睇單」。
文章及照片來源：表揚好姐姐開心分享區Facebook
