諗番未做媽媽前真係好懶。每個星期六日唔駛番工就瞓到12點先起身，瞓醒第一樣野係開電視，食早餐追劇，追到眼瞓又瞓過。洗完既衫放到個窗台同椅背都係衫山。每次假期就係咁「懶」洋洋。
如果問我有無幫手做家務？
「煮飯。我到廿幾歲女先第一次洗米煮飯。」仲要係同老公結婚後先學煮飯。「洗衫。我唔識開洗衣機」但我會幫手晾衫。「掃地。我唔識揸掃把掃地。因為吸塵機仲方便。」
但有樣野我一定唔懶，仲要係由細訓練到大既就係拖地。因為我有養狗，每朝早狗狗去完廁所我都要清潔拖地。而我隻狗仲要係狼狗，咁大隻狗一定唔可以懶，每日要帶落街。而我既責任感就係咁樣練成。
而家做左媽媽後「懶」已成過去。同唔可以「懶」。
John仔歲幾時，夜晚瞓覺開著風扇唔記得熄就出事喇。因為我「懶」諗住吹多陣涼的先熄，之後我瞓著左，第二日吹病成家。
John仔兩歲時，佢瞓著覺後我「懶」唔記得開番個床欄，我就走左去做自己野，結果John仔碌左落床，咬到條脷流晒血喊爆。
經過「懶」既經驗令我怕左。同自己講唔可以「懶」否則後果嚴重。
我大住肚期間每朝送John仔番學，再去買餸煮飯，又趕番學校接放學。其實我有諗過「懶」坐校車。
但我想陪伴John仔享受N班既歡樂時光，每日送番學接放學等John仔感受媽媽每日陪住佢，咁細個得兩三歲人仔，坐校車我驚校車多細菌會交叉感染。佢有濕疹好痕時無人幫佢查膏，會抓到流血。
之後就會好多人問我咁辛苦為咩？可能好多野我真係諗多左做多左，怕自己每次「懶」左既時候就會出事，我會後悔莫及又會怪自己「懶」害左個仔。
其實我都好想「懶」好想好似以前咁瞓好多。但做左媽媽後每做一件事情，都係圍繞住小朋友既好處著想，會將自己放到最後，而咁辛苦我都覺得係值架。
做媽媽後「堅強」同「急耐力」迫使我同「懶惰」絕交。為母則強。願與大家共勉之！
