第三波疫情一發不可收拾，每日本地確診數字不斷上升，要控制疫情惡化，莫非就只有「禁足令」先可以幫到手？對於港大微生物學系講座教授袁國勇早前表示，如果喺新防疫措施實施7至14日後，個案依然以幾何級數增加的話，當局就可能要實施「禁足令」先可以真正控制疫情，此話一出即時惹起大眾激烈討論，有人會話要返工搵食點禁足，亦有人會擔心糧食問題，呢啲關乎日常嘅疑問，似乎都相當合理 。
講到禁足令呢個話題，JM們亦各有意見，呢邊廂舉腳贊成想快啲實行，唔好搞到人心惶惶，控制疫情再齊齊外出，咪皆大喜歡囉，但那邊廂就有JM話最好大家都身體健康，因為若然要實行禁足令就會令一班老友記無得如常晨運飲茶，Juicy媽睇到呢度都不禁反咗個白眼！
「叫佢唔好落街啦，就話喺屋企坐監。」
「長者更應該留係屋企，忍十幾廿日啦！」
「你有冇本末倒置咗？你應該叫班長者飲少一餐茶」
討論區熱話：好多長老慣晨運飲茶行禁足令咁點算？
討論區熱話：好想快點實行禁足令
討論區熱話：好多長老慣晨運飲茶行禁足令咁點算？
討論區熱話：好想快點實行禁足令
大佬咪玩啦！若然人人都身體健康，就唔會有禁足令呢樣嘢啦，如果真係不幸地要實施，又會唔會係條命緊要過食過包呀，老人家抵抗力差，都唔好話有冇禁足令都應該減少外出，就算出去唞下氣，都應該避免去啲多人嘅地方啦，依家講緊飲茶、晨運、食個包，對於佢哋嚟講真係似乎每件事都係高危動作！
不過Juicy媽又唔係唔明，有啲老人家確係好唔聽話，好似隔離屋陳師奶個99，呢個時勢仲堅持成日出街周圍去之餘，聽到話如果疫情再惡化，就有可能要實施禁足令，就即時話人傻傻地，唔使買嘢食咩，唔講仲以為要你禁足一世，你話有長期病患嘅老人家就話擔心唔知點覆診、睇醫生啫，剩係食呢個問題，一般家庭要有儲備都唔係太困難啩，都係嗰句啦到底係條命緊要定係行街吹吹風緊要，我明，喺屋悶呀嘛，咁依家咪全香港人陪你悶囉，公平唔公平呀？都唔好話你唔怕染病呀，如果你一個人染病傳比屋企人係一件事，周圍去播菌又係另一件事，最慘一變四，四變十二，增加醫療壓力，到時醫療爆煲、經濟爆煲就唔慌有啖好食啦！
