好多時帶小朋友去飲茶，茶樓都會酌情豁免收茶錢，但事實上並沒有明文規定一定要免茶。有港媽日前在社交平台發文，指自己一家6口去飲茶叫6人位，其中包括未夠一歲的嬰兒，至入座時卻被經理告知需要付足6位茶錢，令她大為不滿，於是發文兼上載經理照片公審。帖文引起網民熱烈討論，有部分網民支持港媽，但同時亦有好多人批評港媽無理取鬧，直指「免茶是人情並非道理」。
根據傳媒報導，該名港媽在Facebook群組「沙田之友」發文，指上星期日（12日）一家大細到太子一間酒樓飲茶，等位時按實際人數「4大2小」取6人籌。至入座時，一位經理通知由於她獲安排了6人座位，因此結賬時需要按人數收取6位茶錢，港媽隨即質疑：「BB未夠1歲都要收茶位咩？」經理堅持要收足，並稱「如果BB唔計茶位，你哋出面再等叫飛」。
港媽對此大為不滿，不解「點解叫咗飛攞咗位坐低坐，因為BB唔計茶位而要起身再等過」，於是發文兼上載經理的照片，藉此投訴酒樓及經理。
帖文引起網民熱議，有人支持港媽，認為是酒樓安排欠妥當，「如果坐低前同事有講低BB照收可能會好啲嘅」、「咁茶樓又真係解釋得唔係咁好，應該講明佔一個位置嘅無論係乜嘢歲數都要計一個茶位錢」、「正常去親酒樓飲茶1個咁細小朋友都唔會收」、「其實Receptionist應該晨早話比人聽因為有啲酒樓，太細個嘅BB係通常唔收錢」；但亦有很多網民都批評事主是無理取鬧的「西客」，「幾多個人收幾多茶錢，除非手抱B，好難話茶樓收你錢，你自己撳飛撳6個人，人哋跟返手續做」、「計人頭，Free比你係人情，唔free係道理」、「要人哋唔計你茶位，一開始你就應該坐4人枱拎飛拎4個大人嘛，又係啲着數拎到盡博大霧嘅人，貪心不足蛇吞象」。
