「幾多對持續愛到幾多歲...」
一句歌詞道盡世間千千萬萬種愛情與婚姻嘅關係，有人會話結婚係戀愛嘅墳墓，但若果事實真係咁，又點解一年365日，咁多人自願跳入個墳墓呢？係咪唔識死嘅人先會選擇結婚？又抑或結婚都只係為咗個名份，為生小朋友鋪路？
最近就有JM喺討論區發出絕望嘅訊號，弱弱地問到底世界上仲有無一心一意嘅男人，向來正能量到爆炸嘅Juicy媽仲以為一定有好多甜豬豬出嚟反駁呢個總結，點知大家反應竟然一面倒偏向灰灰豬思想，有JM就認為：「我相信係某一個時期的一心一意是有的。一生一世只愛一人是沒有的。」、「原諒他是想自己好過一點，但要我重新相信他是沒有可能」、「所以女人必須要自愛」，睇到呢啲留言真係愈睇愈傷心，仲差啲就抽離唔到，認定自己個C6最終都一定會出軌......
不過諗深一層，講到是否可以一心一意愛一個人，個人認為係同性別無關，其次係大家對出軌似乎都有唔同定義。先撇除都唔可以形容為啱嘅「行為出軌」，咁到底咩先叫「思想出軌」？例如有唔少JM都會勁肉緊關心姜B（姜濤），怕佢肚餓怕佢凍，但你又何曾擔心個自己個C6空虛、寂寞又凍呢？好！你話姜B係細路仔，當佢仔咁錫，咁日日煲劇，見到啲Oppa就心心眼又點計先？咁你又係咪思想出軌？
其實講咗咁多，想帶出嘅都係一個老土嘅道理，與其日晚防小三，不如都係好好同C6溝通，始終感情都係需要由兩個人去守護！真正了解另一半嘅需要，講出自己心底嘅感受，好好磨合同成長，杜絕感情上嘅小裂縫！
