近年本港出現移民潮，不少年輕父母為了下一代的教育和更好的生活環境，選擇放下香港的一切，到外地展開新生活。然而，不是每個人都可以毅然放下香港的事業和家人，亦有人因為是否移民而與另一半出現爭拗。有港媽在社交平台發文，列出5大不欲移民的原因，更指丈夫每天洗腦式要求移民，令她不勝其煩，大呻：「唔移民就係罪人？」
該名港媽向Facebook專頁「生仔要考牌系列」投稿，指出對移民的感受。她分享指，老公想移民，經常以不同方式洗腦，包括播放介紹英國的短片，更經常分享身邊朋友移民的消息，又表示朋友移民後的生活很愉快，更指有朋友問他為何不帶同兩個孩子移民，令她感到無奈，「好似想話我知，全世界都走，得我賴死喺度！」。
對於身邊的朋友移民，港媽表示可以理解，明白大家都想呼吸自由的空氣，又希望讓子女在更好的環境下生長和學習，但她自己卻有不同的顧慮。她列出5大不欲移民的理由，首先她是個在職媽媽，更是一位專業人士，現在的成就全靠努力讀書、實習和考牌才能得到，而且她對於工作的性質內容、工時、薪金和人事等都滿意，同時亦很珍惜現有的工作，所以更擔心移民後的事業發展，「先唔講要經歷重新讀書、實習、考牌嘅過程後，先可以做返老本行，就算可以重操故業，都好大機會要返shift同假日。」
《原諒他77次》劇照
對於港媽來說，若然要重新讀書和考牌，自己亦唔有信心可以應付，「如果過到去要一路湊住兩件，一路擠時間出嚟溫書做project，我好懷疑自己究竟有冇呢個能耐。」因此，她認為如果辭去現有工作移民的機會成本太高，擔心即使抱著嘗試的心態，日後回流亦未能找到類似的工作。假如要她放棄高薪厚職，到外地由低做起，她亦自覺沒有如此瀟灑，「我呢刻仲未可以跨過心理關口，況且搵到嘅工種、工時、工資亦未必係我想要」。
再者，港媽表示自己從小不是個適應力強的人，由幼稚園到大學，每當情緒受困擾，都需要社工、老師或家人的輔導和扶持。她自問適應力弱，很需要別人的扶持，可惜她對老公的信心卻不大，「我老公雖然唔可以話係豬隊友，但都一定唔係神隊友。每日返嚟都話『好攰』『尋晚瞓唔好』『冇精神，好大壓力』，一有時間就會碌電話或打機減壓，就算陪住細路都係機不離手」。而且，每當兩人出現爭吵，老公從不退讓，「因為我轉數唔夠佢快，講嘢唔夠佢叻。我又容易嗌交嗌到喊」。
不過，港媽最擔心的是移民後人生路不熟，沒有長老和工人姐姐的幫忙，老公的性格亦不會改變，令她成為最受壓的人，「我一個人冇晒緩兵點搞？我已經想像到，到時佢哋個個都happy，我就啞子食黃蓮，自己鬱到病！」
此外，港人想移民大多是響往外國的生活，但港媽認為雖然香港的住屋、環境和教育比不上英國，但在天氣、衣食、交通方面卻勝過英國。
至於下一代的教育問題，港媽不反對小朋友到外國留學，但孩子目前年紀還小，正就讀幼稚園，她更希望子女在港認識廣東文化和廣東話，日後才到外國擴闊眼界，「廣東話係母語，我希望小朋友對佢熟悉，識讀講聽寫，如果去到英國冇動力，又冇得學以致用就太可惜了。」
港媽表示，明白為人父母都想給子女最好的一切，她自己也是，只是不明白移民是否最好的選擇，「係咪為咗細路一定要放棄自己的理想和上一代？究竟呢一刻唔舉家移民，係咪等於推小朋友落火坑？我唔想做千古罪人……」
帖文引起熱議，有人批評港媽自私，認為她只是不想放棄高薪厚職，「好自私，由頭到尾只諗自己」、「你冇講唔移民會點為自己仔女打算，所以你都說服唔到你老公。我知道好多人想小朋友盡早去外國讀書，兩公婆天各一方，一個放棄工作去陪讀，另一個留港搵錢留後路，你又接唔接受到？」、「一個只為自己前途嘅媽媽」
亦有人認為最大問題是兩夫妻的價值觀不同，「點解一定要走先係好？如果唔想走，將來都可以送小朋友出去讀書，無問題喎」、「冇問題,但求下你送仔女去外國讀書落地生根/講到你它(老)公咁差不如放手同老公離婚」。
不過，亦有人認為不一定要移民才是為子女著想，「移唔移民，條路自己揀。移民唔一定比到最好小朋友，唔移民都唔一定係累咗小朋友」、「每個人都有自己要考慮既情況，唔好比d人情緒勒索你話移民一定係對仔女好。曾經見過一個case係喺香港揾到錢，有錢比小朋友上好多唔同興趣班，移咗民後就要慳好多，唔可以提供咁多比對仔女，對仔女怨返爸爸點解要移民。」
文章獲「生仔要考牌系列」授權轉載
