每個媽媽內心都住咗一個痴漢！生出嚟嗰隻係自己心肝寶貝，當然錫到燶啦～日日見到佢咁可愛，想瘋狂啜佢幾百下都不在話下，原來仲有以下瘋狂行為！
（PG家長指引：如果未曾做人父母，記得要喺家長嘅陪同之下收睇，以便解釋以下行為。）
起勢索BB味
就算唔係做人呀媽，都會覺得BB身上有陣香香地嘅奶味，真係好治癒！索下佢頭仔、臉仔同身仔，香噴噴好想一啖咬落去呀～有啲媽媽嘅喜好有啲特別，鐘意BB出汗之後索佢，臭臭地先好聞咁話喎。
趁BB瞓覺又摸又錫
見到BB好似天使咁嘅睡顏，真係好難把持得住！總係忍唔住摸摸佢臉珠、頭髮、手仔、腳仔。摸完都未夠，仲要偷偷鍚佢（醒咗就冇咁順攤架啦）。
聞BB腳仔
BB腳仔滑捋捋，摸下摸下就忍唔住控埋去聞。有媽媽表示，愈臭愈過癮、愈鐘意聞！
咬BB腳趾
腳趾一粒粒園碌碌又嬌嫩，好似啱啱摘落嚟嘅提子咁。媽媽就最鐘意食啦，哈哈哈～
聞手指口水味
呢個興趣可能比較小眾，BB啜完手指仔，有啲媽媽會拎上手，聞手指上面啲口、水、味！
近距離聞Poo Poo
最後大佬嚟喇！好多媽媽都學識觀察Poo Poo去監測BB嘅健康狀況。但咪住先，係咪真係有需要控到咁埋去聞先？！可能喺痴漢level.999嘅媽媽眼中，個B痾出嚟嘅都係香架啦！
