你好呀成哥，我之前欠債不少，現已還左大部份既債務，並已加開始可以儲到錢！
我想謝教你，你成日都話要了解人地公司既業務，其實呢d資訊我可以係邊到搵到架？
如果我資金得2萬，應唔應該先買少少股票先呢？定應該儲多d彈藥先？
另外成日睇到話有月供股，想請問係點做架？係咪銀行就有架喇？期待你既回覆！謝謝你
個案重點：
·過往欠債不少，現大部分已還
·現開始儲錢
·資金$2萬
重點目標：
·想開始投資
·月供股票是否適合
龔成老師分析：
你過往負債較多，現時已基本處理好，之後不要再有負債，要從基本的理財模式著手，如果你過往好習慣以信用卡比錢，或分期付款，甚至借錢買物品，之後就要避免，要由負債消費，變為儲蓄消費。
你現時只有$2萬現金，並不多，建議這刻儲多些現金先投資，同時了解下股票先，唔需要心急開始投資。
我地進行理財，其實是一個攻守兼備的過程，你之前就是理財不善，令自己處於不利局面，這刻要一步步做好理財，不要急投資。
首先要做好防守的部分，例如現金（一般要持有3-6個月的支出，作為備用現金），到之後再有閒錢剩，就可以作為進攻，即是投資的部分。留意，理財是一個長期的過程，唔好比中短期的因素影響，所以要閒錢，中短期不用的資金先會作投資。
我們投資股票，就是買入企業，你試想想，如果你有朋友叫你夾錢做生意，你要了解甚麼？當然是生意做成點。買股票都一樣，原理是將你的錢，入股到該公司中。
你可以到財經網站了解企業做甚麼生意，這都是基本步，下一步就是更深入了解企業，包括年報、該企業的網站，甚至從產品去了解。我多年前投資過六福（0590），其中一步分析就是去睇六福的鋪，當時睇左十幾間，分析當中的生意、人流、店員、產品，先決定投資這股。
至於月供股票，一般的銀行都有提供。
簡單來說，月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。
形式就是每月投入相同的金額，買入同一隻或多隻股票，並持續進行。
例如，每月以相同金額$10,000 買入股票A，假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。
總結這三個月，投入了的資金為$30,000，累積股票為1019股，平均買入價為$29.4。
由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。
要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3 年以上，之後持有5年以上。
月供最重要的一點，是「選股」，如果你無選股能力，就投資ETF。
我相信月供股票適合你的，但你這刻應該多儲現金先，等有一定的現金數目，就可以開始月供股票，到時你可以考慮將每月可儲蓄的一半，去進行月供計劃，長期進行，一步步累積財富。
