記得小時侯有段時間經常跟家人去睇樓，每次都有一種說不出的興奮，就是有鋪「睇樓癮」，當然那時侯還少不更事，只是八卦鬧著玩的心態。想不到今天自己確實計劃與另一半置業，真正踏上睇樓之路，尋找自己的「上車」盤。
睇樓看似簡單，但原來背後要注意的事項可以說是海量！肥肥兒先精選新手睇樓前必備4點分享：
1）買樓預算
說到買樓，首要當然離不開金錢預算。新仔一定要了解市場的遊戲規則及自己的財政狀況，最基本都要知道按揭成數、壓力測試及供款計法等。坊間都有不少網上免費工具幫手，用家只要簡單輸入資料如家庭入息、其他債務等去計算一下自己的供款能力。計好自己可以確實支付的首期金額、每月可負擔的供款金額，就可以推算可買樓的價格範圍。
當然，計算上一定預鬆好過預緊，千萬不要計得太盡「一鋪清袋」，還謹記預留約20-30萬作裝修及添置傢俬之用，以及足夠半年使用的生活費，作為應急或後備錢。
2）訂好揀樓條件及次序
揀樓的條件都不外乎金錢、尺數、樓齡、地區、環境、交通、生活配套、升值潛力等。但始終針無兩頭利，樓也沒有完美，有多個錢當然較大機會買到心頭好，但對於首次「上車」的朋友，好多時都要將貨就價。所以要清楚自己以那幾個首要條件作為考量，再收窄睇樓範圍知道自己可以有甚麼選擇。
3）上網預先做功課
見地產經理前，要自己預先做功課「打底」，初步了解市場動態，以免被「搵笨」！肥肥兒另一半（以後稱為：肥伴）都有很努力上網留意行情，看心儀地區的放盤、最新成交資料，務求把握好市場資訊。
市場上有很多實用的網上平台幫手，例如Squarefoot 、 Spacious 千居及 Gohome 等，全部都十分方便易用。我們則較常用28hse，這沒有特別研究，就是個人偏好。
到睇樓的時侯，少不免會與地產經紀會交流，你不想被套料曝露你是新手，或是額頭刻著「搵我笨」，就真的要做功課！再且，你越知得多，地產經理才會當你是實客，大機會推薦「荀盤」給你。
4）找幾間不同地產代理
抱住一個心態：要假設天下間的地產代理都是奸，無論他外表有多善良。有地膽代理專出招數欺騙新手，把「豬頭骨」當搶手貨。相約幾組客人同一時間睇樓扮搶手，實情根本是賣不去的死貨。
所以真的不怕貨比三間，要同時找不同的經紀，亦不用擔心讓對方知道你找過幾間地產睇樓，這樣他們才不會報貴價或出古惑。
今次先分享睇樓前的重要準備功夫，下回有機會再分享睇樓時的注意要點！
