屋企冇經濟壓力，又唔使供樓，仔女有高薪厚職，仲要唔要畀家用？討論區熱話，有家長分享，佢哋三房千呎樓已供滿，阿仔出身做大行銀行IT，仍然同屋企人同住，但係從來無畀過家用。而家個仔打算結婚，仲諗住結婚之後帶埋老婆同爸媽同住，方便儲多幾年錢之後同老婆移民。香港地百物騰貴，下下要仔女搬出去自住經濟負擔的確好重，但日日食屋企住屋企，都應該要負擔部分家庭開支。仔女總有離家嘅一日，教仔女要有責任感同埋對家庭生活開支有概念，宜早不宜遲，遲教總好過唔教。
討論區熱話：阿仔咁樣，你接受到嗎？
3招要仔女負責任：
1. 畀家用係責任同心意
除非仔女收入非常低微，否則都要畀家用。家中燈油火蠟水電媒都有份用，應負擔部分費用，按收入某個百分比或同仔女協議金額，定時定候、自動自覺畀家用。另外，爸媽教養仔女多年，無論係金錢上定係心思都付出好多，仔女出身後固然要照顧、陪伴爸媽，即使爸媽無經濟壓力亦應畀家用以示心意。其實好多爸媽都唔係等住啲家用開飯，甚至會幫仔女儲起啲家用，等第時有需要時拎出黎用，畀家用好多時都係心意啫！
2. 搬出自住自立門戶
香港地住屋問題困擾唔少年輕一代，有唔少已經出身嘅年輕人都仍然同爸媽同住，減輕開支。不過，爸媽要畀心理準備啲仔女，當收入許可嘅時候，就應自立門戶，過獨立的生活，開托自己的生活同天地，等子女知道有能力就應該自己負責自己嘅生活，唔好打算要爸媽資助住屋需要。其實爸媽要仔女自立門戶，都係想仔女學習獨立，自己照顧自己，唔係想夾硬趕啲仔女出街。有邊個爸媽唔想同啲仔女見多幾面吖？
3. 承擔成家立室嘅責任
仔女結婚之後就建立屬於自己嘅家庭，做人哋嘅老公/老婆。爸媽應該教仔女表明婚後應有自己嘅生活，要對自己婚後嘅家庭負責任，經濟有能力就應搬出，成為一個獨立嘅家庭，靠自己照顧老婆仔女。爸媽供養子女多年已花唔少錢同心力，既然自己有能力擔起自己嘅家庭，就應該令爸媽嘅生活輕鬆啲，減少照顧仔女嘅憂慮（同一屋下，好難完全唔過問/唔照顧子女嘅生活），等佢哋安心儲錢準備退休生活。做爸媽嘅都樂意見到仔女成家立室，如果見到仔女可以獨當一面，孭起頭家，更係倍感安慰呢！
