其實人生唔係贏就係輸，輸咗要認，呢樣嘢亦係我一向憑行嘅宗旨，贏輸好多人會睇得好重。其實輸咗咪輸咗，一啲無謂嘅面子要嚟做乜？不過可能我出身窮困家庭，我根本唔介意輸，相反贏嘅時候好容易令我看不通局面。早幾年亦試過一次好寶貴嘅經驗，之前咁多年投資得心應手，逐漸發覺自己係接近神嘅男人，開始會有自大嘅心態，無咗風險管理同危機意識，最終2015年係我人生輸得最甘嘅一年。
但亦好好彩，一來輸嘅時間夠年青，未係七老八十，同埋我個人係永遠唔會因為失敗咗就停落嚟，呢個可能亦因為不服輸嘅心態，最終搵到其他機會將佢賺番嚟。有時輸咗認咗俾人笑吓好閒，最重要你係要從輸或失敗中得到經驗，唔好笑我話鬼唔知咩？但其實好多人會輸好多次係同一個錯誤上，我就好少少，通常同一個錯誤唔會錯兩次，而且仲會將呢方面嘅錯誤強化成一項技能。
要面係世上最無謂嘅一樣心態，輸贏本屬平常。做人要夠面皮厚，咁樣你嘅心理質素會比所有人都強。成功嘅人，有邊個未輸過，你見到佢冇試過輸，其實可能係佢之前已經輸得太多，學乖了，咁你呢？咁介意人哋點睇，成世都會唔開心。
