話說呢兩日喺討論區就見到有人cap咗圖，睇到有個港媽喺網上面招聘家庭教師，而嗰個要求列表居然係水蛇春咁長！JM都喺討論區度講，請全職家庭老師，都唔係第一次見，但呢個真係太誇張。教都算，仲要全面照顧、環境設計、行政、緊急事宜、旅行都要跟埋，個人有咩興趣都要管，慘過做奴隸。JM反問，咩都人哋做晒，咁其實父母生嚟做咩？
講返個「天條」列表，除咗最基本要睇住兩個分別K2同小一嘅小朋友做功課之外，仲有好多額外嘅工作都要處理埋，唔講以為佢要請助手！總之有關屋企嘅嘢就樣樣都要理，樣樣都要幫！其中Juicy媽我覺得最奇怪嘅係，「願意陪伴旅行工作」，吓，乜依家做家庭老師要陪埋佢哋去旅行？係幫手一齊諗行程定係想邊去旅行邊補課呀？
相關討論：請老師之「一山還有一山高」
仲有呀，個人興趣都要管，招聘人話想個全職家庭老師有音樂、藝術同烹飪方面嘅興趣；又要佢有幼稚園或者小學教育經驗……真係心諗，打算畀幾多人工先？
有個留言秒回，話呢個阿媽嘅要求，「工作要求高過教育局局長職位」，教育局局長個職責都無佢咁多啦！好多人都話，最緊要睇幾多人工啦，如果好高人工，咁做咁多嘢都幾合理嘅。仲有啲留言都幾搞笑：
全部都好合理……如果肯每月畀10萬、8萬請的話。偏偏這類人往往最孤寒！
我覺得似徵婚廣告。係咪咩speed dating公司、婚姻介紹所嘅廣告嚟？呢張招聘廣告似足招聘老婆、老公！
睇吓佢出咩人工先。有啲真係富貴到，連私人司機都有。
佢想請個代母返嚟？唔係代生，係代教養。咁生佢嘅父母做啲咩？
見有一項話要同工人、司機協調，應該係超級富豪請人？不過超級富豪又洗乜上網請人，畀錢叫獵頭公司搵都得。
計我Juicy媽話，講到要做咁多嘢，都係講錢最實際，如果仲有好多福利就更好啦！
