為人父母，最希望嘅當然係小朋友健健康康，不過有時見到仔女全日唔講嘢，又唔會主動去同其他小朋友玩，都會擔心佢哋係咪有自閉症。究竟係多疑過慮，定係應該帶佢哋去檢查？不如先了解一下自閉症嘅3大徵狀再作決定吧。
自閉症係先天腦部功能受損傷而引起嘅發展障礙，根據協康會嘅資料，美國疾病控制及預防中心係今年3月公布嘅最新數據發現，每54個兒童入面就有一個患有自閉症。雖然依家仲未清楚致病原因，但自閉症嘅治療黃金時期為0-3歲，只要多啲同小朋友互動、溝通，及早發現問題並接受適當嘅行為治療，成功舒緩病症嘅機率就愈高。
患有自閉症嘅小朋友喺社交、語言溝通同行為3方面會出現唔同程度嘅困難，而大多數徵狀係3歲前就會出現，根據國際精神疾病診斷手冊，自閉症兒童主要有以下3大特徵：
1.人際關係：唔識得同同齡小朋友建立友誼、唔識得表達自己、鍾意一個人自己玩、唔會同人有眼神交流、拒絕或逃避身體接觸、察覺唔到其他人嘅存在和感受等。
2.語言溝通：語言理解同語言使用上嘅發展遲緩、缺乏理解同表達嘅能力、缺乏一般人傾計時一來一往嘅相互溝通特性、會將過去學過嘅語言機械式咁重複訴說等。
3.狹窄反覆嘅同一性行為：堅持使用特定嘅程序或模式做嘢、不尋常咁持續同重複地玩同一個遊戲、鍾意睇旋轉嘅嘢或經常自轉、會不時做出擺動身體等重複性動作。
對於自閉症，原來唔少JM都有同一個坊間迷思–自閉症兒童係咪比一般小朋友聰明？
根據國外多個統計，其實只有2.7%嘅自閉症兒童IQ超過115（正常人為85-110），大多數患者擁有嘅智力都同一般小朋友無分別，智商都係有高有低，屬於正常範圍。雖然有唔少自閉症兒童確實係記憶力同音樂藝術等領域叻啲，但呢啲過人表現都唔代表佢哋擁有高人一等嘅智商，因為佢哋要擺更多嘅時間去學普通小朋友好易就學到嘅嘢，以綜合表現去睇大家嘅智商都係差不多。
