話說前排WFH,加上疫情無得出街。我除咗學識咗點剪頭髮之外,全身仲多咗幾兩肉。無計,在家工作真係連街都唔使出,日日坐喺電腦面前做嘢,最多都係行去廚房煮吓嘢食,口痕又會出廳拎零食……久而久之,某日照鏡時發覺塊面好似漲咗少少,初時仲以為係「水腫」。點知隔多幾日再照鏡,啲「水腫」都係唔退,我就知道,今次瀨~嘢~喇~
更多文章:【在家理髮室】疫症下剪頭髮不求人?
雖然就唔係話有咩大日子,但繼續咁落去都係唔係辦法,就搵下有冇咩急救餐單喇。嗱嗱嗱,講明先,節食都要配合運動,如果唔係啲就會鬆鬆,全身無肌肉線條都係唔靚架。我呢就係會去踩單車加有啞鈴嘅,有興趣就再分享單車路線啦。仲有,呢個餐單一定係「急救」先可以食,唔好連續食兩次,或者食多過四日呀!
話明係急救,呢三日入面就唔好食其他嘢喇。第一二日真係好飽,又未去到好難捱,不過食到第三日都仲食緊同一樣嘢就真係有少少厭囉。結果呢三日入面我就輕咗五磅,唔知大家又可以輕到幾多呢?
唔好話我煩,唔可以一次過食兩次,亦都唔好成日咁樣食呀,急救咋!
送上3日急救修身餐單~
早餐
1公升水
1隻烚蛋、3條青瓜仔、1杯走甜走奶咖啡或1杯熱茶
午餐(最豐富,食唔晒都唔緊要)
1公升水
1隻烚蛋、1個西蘭花或1個椰菜花或1個椰菜、1包菇、15-18隻蝦或6條雞柳、1個洋蔥
下午茶(肚餓先食啦)
1公升水
10-12條甘荀BB
晚餐
1公升水
3條青瓜仔或1個火龍果
要注意嘅係,上面堆嘢食盡量八個鐘內食晒!當然如果食唔晒就唔好勉強啦,我就有兩日都無食晒。另外全日加埋要飲四公升水!咁先可以幫助排便便!當完成咗呢個三日修身餐單之後,記得唔好即刻「暴飲暴食」!應該繼續按自己嘅「基礎代謝」卡路里嚟進食。唔識計?基礎代謝BMR(Basal Metabolic Rate)計算器傳送門。
去「水腫」點都係個持久戰,嚟緊我都會試下唔同嘅急救餐單,有機會再分享吓畀大家啦❤️