作為阿爸阿媽，最驚就係同啲仔女之間有「鴻溝」，但而家啲細路講嘅潮語真係好似外星文咁日日都有新嘢，睇完都唔知佢哋講乜！正所謂知己知彼，百戰百勝，為咗了解仔女更多，Whatsapp唔使睇到黑人問號，一齊嚟學吓而家中學生嘅常用潮語啦！
日常生活篇
係愛呀哈利 = 電影《哈利波特》鄧不利多的嘅對白。解答問題時經常都會用呢句潮語。
「年輕人，係咩驅使你……係愛吖？定係責任呀？」「係窮呀！DLGH！」= 對話出自2018年6月打風兼暴雨期間仍要返工嘅兩位地盤工，短片喺網上瘋傳。「年輕人，係咩驅使你……」成為年輕愛用句式。＊「DLGH」係粗口，請自行Google。
Lol = 笑死人，英文「Laugh Out Loud」嘅簡稱，中文可解作「哈哈大笑」。常用嚟表達恥笑、無奈或不認同。
GG = Good Game的縮寫，原本係打機輸咗嗰方向贏家表示禮貌，後尾引申成指自己Game Over，完蛋了。例句：考試完全唔識，今次真係GG了。
FF = Final Fantasy幻想。出自著名電子遊戲《FINAL FANTASY》（最終幻想）嘅簡稱。
一齊食雞 = 一齊玩網上遊戲PUBG（PlayerUnknown's Battlegrounds簡稱，中譯《絕地求生》）。
中二病 = 形容經常自以為是地活喺自己世界嘅人，經常會做出自我滿足嘅特別言行或行為，由於多見於中學二年級，所以稱為中二。
真心咩 = 真係咁咩？表面上問「真的嗎」，但其實略帶嘲笑對方愚蠢嘅意思。
啱呀 = 用嚟結束某個話題。任何情況都可以用。
實係咁啦／會唔會係咁呀 = 反話，唔認同對方所講。
Real咩／認真咩 = 真係咁咩？
1999 = 講嘢一舊舊。
9588 = 九唔搭八。
係精神嘅 = 幾好啦。原本出自賣倫敦金人士，佢哋一搵到買家入錢，就會喺群組講：「精神！爆數！」所以呢班倫敦金賣家又叫「精神仔」。
OP =「Over Power」的縮寫，意指某人太強勁了。例句：你咁樣鬧老師好OP。
Fing = Hea。例句：放學喺學校周圍fing。
X到一個點 = 形容非常X（X=形容詞）。例句：Cheap到一個點、低能到一個點，勁到一個點、型到一個點。
好雷 = 好伏／好廢。例句：打機打得咁廢，好雷呀你。雷住晒。
着咗 = 嬲到着咗火。
跳晒掣 = 嬲到跳晒掣。例句：今日真係好跳。
XX啲Friend = 形容人、事、物類似XX／與XX同類。例句：間Café有咩食架？西餐啲Friend囉。
HeHe／SheShe = 男／女同性戀者，常被用作嘲笑疑似同性戀嘅行為。例句：咦～你兩個好HeHe囉！
世界級／有仙氣／女神 = 好靚女。
gfable = Girlfriendable，形容女仔好適合做女朋友，有女朋友嘅感覺。
bfable = Boyfriendable，形容男仔好適合做男朋友，有男朋友嘅感覺。
法唔法國 = 發唔發覺。
好尷尬／尷尬癌 = 諗唔到點答對方時用。
邊間教會 = 諷刺緊首歌唔啱音，好似傳統教會歌咁，啲歌詞唔啱音。
molamola = 「無喇無喇」諧音。意指市況不似預期，將會蝕好多錢，常見於各大討論區嘅財經相關討論。
fatfatla = 「發發啦」諧音，意指發達喇！常見於各大討論區嘅財經相關討論。
唔Get = 唔理解。
腹黑 = 笑面虎，形容表面睇落和善溫文，但其實奸奸哋。來自日文漢字詞語。
SKR = 類似屈機。原本係外國Rapper用嚟形容車輛快速行駛嘅「跣胎」聲，或用來代表掩臉嘅意思。例如當有人講咗啲好荒謬嘅事，你冇眼睇，就可以用「Skr」。不過藝人吳亦凡喺《中國有嘻哈》將呢個詞當係一個用嚟形容「某人好有說唱天賦同技巧」。
男女關係／戀愛篇
戀愛有分 A、C、O，用嚟形容「Status」；數字正、負數就指拍拖次數。
A = Available；C = Complicated；O = Occupied
正數如 1、2、3 = 與異性拍拖次數。
負數如 -1、-2、-3 = 與同性拍拖次數。
數值可以抵銷，例如拍過一次同性、一次異性，然後都散咗，就會變返 A0。
A0 = 冇拍過拖
A380 = 形容有極多拍拖經驗。
出Pool = 正式有拖拍，以前主要係大學生用，但而家演變到中學生已經有人要請食出Pool飯。
娘娘 = 觀音 = 類似女神咁解，但帶有貶義，泛指用各種方法吸引男士成為其跟隨者嘅女性。享受追求者獻殷勤，但一落都唔確立關係，得閒畀甜頭對方，等對方繼續死心塌地追隨。招攬跟隨者的行為俗稱「招兵」、「收兵」。
大將軍 = 觀音兵既頭號兵。
觀音兵 = 形容為咗追求異性，願意為佢做各種事，極為順從，多用於男性。
入伍 = 做兵 = 成為女神嘅觀音兵，無「男友」名分但仍甘心向觀音娘娘獻殷勤。
運輸兵 = 柴可夫司機，有車嘅觀音兵。
單身狗 = 單身人士，帶自眨／自嘲嘅意思。
派狗糧 = 情侶晒恩愛放閃。「單身狗食狗糧」指單身人士畀情侶嘅閃光彈照到。
帽事嘅 = 由「戴綠帽+冇事嘅」演變而成。反話形式諷刺男人戴綠帽。
一詞多意
J (n.) = 男性生殖器官。
J (v.) = 可解作「目及」，亦可解作「打飛機」。常用詞彙：「J咗」、「打J」。
J (adj.) = 類似「正」、「掂」，常用詞彙：「好好J」、「J到爆」、「佢勁J囉！」。
丁 = J。
「J圖」、「J Post」、「J某某人」、「J到出血」,etc.
J一樣嘢，即係嗰件事／人令人好有幻想、好正。
粗口篇（涉及粗口諧音，想知係咩請自行Google～）
JM9 = 做乜+數字。例句：嘩！前面條友件衫JM9 呀！
呃蝦條 = 形容欺騙青春少女嘅行為。
wtf = 英文粗口簡寫。
Cal9lation = 喺「Calculation（算數）」中間加入「9」字，即「算9數」。例句：佢似Taylor Swift？Cal9lation啦！
內地用語篇
屁孩 = 幼稚，不成熟。
我也是醉了 = 表達無語、無奈、鬱悶。例句：吓？咁都得？我也是醉了。
綠茶婊 = 扮綠茶咁清純嘅婊子，外表柔弱純情無辜，實則好有心計嘅女仔。
白蓮花 = 玉潔冰清嘅女仔，好似蓮花咁出於汚泥而不染。
87 = 普通話「白痴」諧音。
487 = 普通話「死白痴」諧音。
666 = 普通話「牛牛牛」諧音 = 勁。
0748 = 普通話「你去死吧」諧音。
傻逼 = 低能白痴。內地嘅粗口。由於百度有河蟹系統，網民會將傻逼譯成「傻B」，其後更衍生出「傻13」。
日本動漫篇
蘿莉 = 可愛妹妹仔。源自「Lolita」一詞。
正太 = 可愛男仔。
二次元 = 動漫世界。
三次元 = 真人世界。
偽娘 = 有女性化嘅外表特質，但生理上係男性。
X控 = X情意結，指對某些人、事、物帶有偏執嘅喜好。例：弟控、蘿莉控。
＊ 以上用語同解釋係集合百家之大成而寫，如有加減、修正，歡迎一齊討論。
