新冠肺炎疫情反覆，為減低感染風險，不少家長都盡量減少帶小朋友外出遊玩，即使週末都留在家中。有港媽特意為子女打造遊戲房，並網購夾公仔機、桌球遊戲機等，把房間佈置成小型冒險樂園，她把房間的照片上傳至社交媒體後，惹來網民的熱烈討論。
港媽Kristy於Facebook群組《淘寶開心share》中發文，表示自己十分喜歡夾公仔，所以從淘寶買來一部夾公仔機，又因為貪玩，故花費萬多元一併購買如Lego牆、桌球機、書櫃、組合梳化等，為子女打造一個玩樂的空間。從她分享的照片中可見，房間有如一個「Party Room」，有籃球機、夾公仔機、桌球機、玩具廚房，還有大量圖書，而且空間十分大，在樓價高企的香港，要擁有一間面積這麼大的玩具房絕對不容易。
帖文引起網民的討論，大家的焦點都放在港媽的家，「間屋超大」、「間房都大過我屋企」、「我都想淘咁大間屋」、「淨係Party房都大過我間房」、「首先要有間大屋」、「羨慕咁大空間，我屋企連走動嘅地方都無，小朋友都無地方玩」；亦有人笑言被貧窮限制了想像：「嘆為觀止」、「再一次貧窮限制了想像系列！！！但真心整得好靚」、「離地屋」；更有人笑指，自己的家中都有空間擺放夾公仔機，但自己就要化身機中的公仔，「我間屋嘅面積都可以擺夾公仔機！不過要訓係部機入面」。
