小小豬成日都話想去落雪地方，好想感受下飄雪嘅氣氛(唉…我夠想啦…唔通想就可以去咩)。既然唔可以去外國感受真正嘅落雪，咁不如就近近地嚟昂坪360玩一轉「冬日雪村」啦~
自上次我地坐過水晶車廂之後，小小豬一直都念念不忙，今次佢可以又再嚟搭一轉，佢又點會唔開心呢~
依兩父子就最鐘意睇風景，睇到眼定定呀~
坐水晶車廂嘅指定動作，基本上依隻豬仔全程都係依個POSE，佢話要由天空望住下面啲人群哦....哈哈哈~
大約25分鐘我地就到昂坪市集啦~
一嚟到昂坪市集，我地就先食少少嘢，然後就去到小朋友最期待嘅有兩個遊戲(戶外溜冰場同埋雪天使)，只要係市集內消費就可以玩。
兩個小男孩第一時間就係去玩戶外溜冰場，場內有齊所有裝備，所以著好晒裝備就可以去玩啦~
小小豬咁大個仔今次都係第二次溜冰，由初時驚驚青青沿邊行，到之後有SY哥哥陪住佢一齊玩，兩個小朋友仲話要比賽~
係冬日雪村佈置前，每日指定時間都會有飄雪效果添~
我知….我知….都只係泡泡嚟，不過小朋友就係充滿童真，當佢地玩得投入嘅時候，真係會幻想自己身在雪地當中，小小豬就係其中一個，佢完完全全覺得啲飄雪係真雪嚟呀….哈哈哈~
小小豬話雪天使就係最好玩，緊係啦…佢地幾個小朋友係入面嚟個雪場大戰互攻擊，我地係旁邊睇都覺得開心~
依隻懶玩豬仲玩到成個人瞓晒係雪下自娛一返(要提一提大家，依啲係仿雪嚟，玩完係會有痴係身，雖然場內都有啲小擦俾我地掃走啲雪粒粒，不過...最好帶多套衫去換啦)~
由於我地今日都比較晏上嚟昂坪市集，所以玩完幾個遊戲，睇完兩個360舞台SHOW，再行左一陣市集同食埋碗豆腐花就已經差唔多要回程了~
原本我想去行下寶蓮寺，小小豬想走樓梯上去大佛都做唔到。原來依家12月有個特別限時優惠，即場買成人來回纜車車票，小朋友就可以用優惠價港幣50元買來回車票(標準車廂)一張或$130(水晶車廂），咁不如趁聖誕假再嚟玩一轉啦！
飄雪聖誕@昂坪市集
日期：即日至2019年1月1日
星期一至星期五飄雪時間：11:30am; 12:45pm; 2:30pm; 4:00pm (4節)
週末及公眾假期飄雪時間： 11:30am; 12:45pm; 2:30pm; 3:30pm; 4:30pm (5節)
戶外溜冰場：昂坪市集消費滿$100起，可以入玩約10分鐘
雪天使：昂坪市集消費滿$100起，可以入玩約10分鐘
