今篇繼續分享第二部分嘅「Kids Plaza」，因為有成三層咁多，而家就繼續餘下館藏得意又好玩嘅景點啦。
離開咗物理、科學、生物學嘅園區後，呢邊有關於世界同地球、國家嘅嘢，有樂器然後我哋會往下走去到日常生活有關嘅角色扮演園區。
唔止咁，見到呢個景，其實係超想每一個角落都影相。不過，周圍都有好玩嘅嘢，就唔想打擾小朋友去玩嘅心情。
因為好似卡通動畫嘅世界咁，上面仲有一條架空嘅橋，幾刺激!!
^和牛B比我想像中仲要大膽，佢竟然夠膽行晒成條橋。
另外仲有一條幾層樓高嘅水管滑梯，夠膽嘅話就去挑戰一下啦~~
地球村入面住咗好多唔同國家嘅人，佢哋嘅民族特式你又知幾多?
仲有充滿民族氣息、特式嘅小角落 (都係影相靚位呀)。
仲有好多唔同嘅樂器，可以俾遊客玩。
不同國家都有佢哋獨一無二嘅民族服，進入前，記得先除鞋呀。
馬上就進入日常生活會接觸到嘅事物，首先會遇上了搭鐵路嘅情景。
日本姨姨真係好親切，佢同和牛B講解同埋落手落腳教佢做。
見和牛B唔夠高，佢仲抱起和牛B扮買車票。
然後，同佢一齊扮嘟車票入閘。
入閘後就可以馬上登上列車啦~車廂同真嘅JR有九成相似~
超有真實感，小朋友都玩得超級開心。
接著落嚟，就係真實環境以及經常會接觸到嘅，去超市購物情景。
小朋友煮飯仔版超級市場，貨架根據種類擺好，肉類又放返去凍櫃。
真係超級真實，我都好想玩呀!!!
就連啲食物都好似真嘅一樣!
兩位小朋友一齊買餸，諗定今晚食乜餸。
揀好貨物，日本姨姨仲要教埋和牛B點樣用收銀機，嘟Bar Code扮俾錢收錢同埋拎返張收據，最有趣係，真係有張收據打印出嚟o架!!
**每次購物遊戲體驗，可以揀5樣貨物，仲有就係玩完記得幫手放返好啲玩具哦~
小朋友嘅商店街，除咗可以去超市Shopping，仲可以參與角色扮演。做廚師、郵差、醫生、警察、髮型師等。
兩位小廚師，超專心去整壽司俾客人食。其實就連呢啲玩具壽司，像真度都超高呀!!!
其實除咗壽司檔，旁邊仲有蛋糕檔、章魚小丸子、烏冬、拉麵檔。
總之就係超好玩、又互動嘅親子角色扮演遊戲。
必玩遊戲扮郵差，日本姨姨超窩心會幫小朋友著好制服、戴好郵差帽。然後會委派任務俾佢(派信)，當小郵差派完信之後，日本姨姨仲會超好笑容歡迎佢哋返嚟，仲話辛苦晒您，同幫佢哋除返件制服俾佢哋「收工」。
^ 日本姨姨正幫和牛B著梗制服
^ 成功變成小郵差嘅和牛B
^ 出發去派信啦~~
^ 警局
^ 髮型屋
和牛爸爸話要電返個靚髮先~BOOM /／
^ 與工程、水務有關
係一個好有趣嘅體驗呀! 其實以上嘅遊戲，絕對係有助小朋友融入社會。
玩完所有角色扮演遊戲，前面仲有一個Play area，有圖書、有木制路軌火車玩具。
我哋當日大概下午2點入場，呢到5點就休館。我哋預晏咗入場，確實唔係好夠喉。
離場後，仲有紀念品店。
紀念金幣機，仲有唔同配件
<入場費>
| 費用 | |
| 成人 | 1,400円 |
| 小中學生 | 800円 |
| 幼兒(3歲以上) | 500円 |
＜開放時間＞
9:30am
- 5pm
(8月1至26日:
9:30am - 7pm)
*每月第二及第三個星期一休館
總結:
其實上篇我都有提及呢到雖然要俾錢入場，但絕對係值回票價，足足有成三層咁多，影相位超多、玩嘅嘢又超多，仲好廣泛，亦有常識學。
Kids Plaza (キッズプラザ大阪)
地址：〒北区扇町2-1−7
(2,493.53 km) 530-0025 大阪市
電話：81 6-6311-6601
http://www.kidsplaza.or.jp/en/
https://www.facebook.com/KidsPlazaOsaka/
--------------------------------------------------
