以前對麵包超人一直無特別好感，但自從陀住和牛B之後，我就開始覺得麵包超人好可愛。
而和牛B都同樣喜歡麵包超人，特別是細菌小子…
所以今次嚟到大阪，當然要去麵包超人館參觀打個卡啦~
嚟到大阪第3日，落雨，住喺黑門市場附近嘅我哋，先去黑門市場食個早餐。
落雨關係，我哋就將行程定咗去麵包超人館，就唔需要怕落雨啦。
而麵包超人館嘅資料、相片都好多，所以又要分兩篇去介紹麵包超人館、细菌秘密基地、摩天輪及餘下行程。
當我睇咗博物館嘅介紹同埋地圖，我都已經覺得好興奮!!
商場部分店舖分得超級仔細，衣、食、住、行、玩具精品店，手信店都分得非常清楚。
當日係星期六，所以人流都比較多，我哋自駕遊去到要其中一個爸爸負責挑隊等泊車，等咗好耐最後就泊咗去附近商場。
未入場前，必先進入麵包超人商場!!!
第一站就見到造型超可愛嘅麵包超人與人物造型麵包、甜點。
由店內到店外，都一樣吸引小朋友目光!!
商場部份真係超級吸引!! 只要你係麵包超人迷，每見到一樣嘢都一定會停留好耐。
店舖仲要分成女孩飾品店，粉紅色嘅裝修，超吸引我!!
仲有手作媽媽最鍾意行嘅材料店，可以買材料返去整刺繡毛巾、背囊、口水肩，總之乜都有!!
商場每一個角落都會搵到麵包超人，就連地下都有會郁動嘅裝置，超可愛呀!
充滿童趣嘅麵包超人商場，又點少得麵包超人嘅汽球呢?
超多麵包超人公仔，仲有好多都係神戶限定!!!
有精品又點少得食物呢? 呢到除咗有即食嘅產品，仲有可以帶返香港嘅手信。
呢間店主要出售包點類嘅產品，真係超級可愛!!
最後我哋買咗麵包超人樣嘅蛋糕粒嚟食，我嘅食後感係「麵包超人樣嘅雞蛋仔」。
入到商場，周圍都係麵包超人，氣氛超好!! 小朋友都超級開心，影相位都超級多，麵包超人嘅商品都超級齊。
麵包超人文具店
呢間似乎係總店，媽咪買到手軟，小朋友試玩玩具玩到手軟。重點係，好多款玩具香港係無o架!
買俾自己、買嚟做手信嘅嘢都好多!!
呢個我覺得係必買商品，麵包超人及其他人物嘅爆谷桶，1,800円，有得食之後又可以當收納桶!! 味道我哋揀咗紅豆焦糖，味道我覺得多咗紅豆味，有少少怪怪的。
但係和牛B食得好開心，仲肯同朋友分享。
孭住喺和牛B到，佢直情係爆谷放題。
餐廳及Food Court
餐廳主要有一間，不過人實在太多了，等太耐。
所以我哋就去咗旁邊烏冬店買，其實都超抵，兒童餐大概800円，但係隻麵包超人碗係送埋俾你做禮物，俾完錢即時俾咗泡泡紙同埋膠袋俾你裝住帶返走。
Food Court座位唔算好多，但係日本人唔會食完/唔幫襯都霸佔座位，所以都好快就等到位。
免費睇表演
商場有個中庭，一大片空地，其實呢到就係睇麵包超人表演嘅地方嚟~~
表演係免費活動，而表演者當然就係~~~麵包超人啦~~仲有細菌小子表演時段~
所以商場區，要追住表演場次睇嘅話，其實都夠玩好多個鐘頭。
如果想知當日表演場次，可以到Information Centre旁了解。
當日我哋好好彩，去到就開始廣播話有表演，霸咗個頭位。大概等左15-20分鐘，就正式表演啦~~~
超級靚位!! 麵包超人都幾跳得~~童心未泯嘅和牛媽媽，開心到想喊出嚟!!
近到!!! 握手位嚟o架!!
同埋，當我見到和牛B願意企起身跟住郁下手仔，我真係好感動!!
之後，到我哋上咗博物館玩咗一陣，又到細菌小子表演啦~~
商場上面就係麵包超人博物館了，買飛嘅位置就係商場上面。
而博物館嘅入場費係1,800円/位，只有1歲或以下係免費嘅。
超多影相位，不過和牛B已經跑咗去玩了~~跑吧! 孩子~~
又有角色扮演區啦~~壽司、煲仔飯~
充滿童趣嘅卡通人物牆~
仲有雪糕店~
仲有免費嘅手工區，場內大部分小朋友都一定會嚟整返個專屬嘅麵包超人帽仔~
俾和牛B自由發揮下，佢眼中嘅麵包超人真係超搞笑呀!!!
然後，開始動動筋骨~四圍玩啦~~
馬上登上麵包超人車~~扮揸車啦~~
呢條彩虹滑梯，絕係麵包超人館嘅Icon。
兩位小朋友，不停瀡，又上又落，都數唔到佢哋到底玩咗幾多次。
重點，會有工作員姐姐幫忙看守秩序~
去到第二個位，都有瀡滑梯~短啲同再BB版啲都有~
嚟到果醬爺爺屋企，當然就係要「扮」整麵包同「扮」焗麵包啦~
SL號火車~小朋友可以登上去影相~
到處都係跑跳活動~超放電!
仲有麵包超人及其他人物嘅場景模型。
入面內有乾坤~~
仲有咖哩包超人嘅教室呀~~
麵包超人電影室~可以俾小朋友坐定定欣賞麵包超人嘅電影。
最後一個放電站，玩麵包超人彈彈波~~~
放完電，就馬上到大人放血買紀念品啦~
博物館嘅商品，同商店街嘅有少少唔同。唔同嘅係，呢到多啲限定商品!!!!!
下半部分，繼續细菌秘密基地、摩天輪及餘下行程介紹。
^ 小朋友入場博物館都會派發紀念品一份~
神戶麵包超人兒童博物館 (神戸アンパンマンこどもミュージアム&モール) 
地址：〒神戶市中央區東川崎町1-6-2
電話：078-341-8855
開放時間： 博物館・细菌秘密基地 10am - 6pm（最後入館 5pm）| 購物商場 - 10am - 7pm
博物館入場費：1,800円 (1歲或以下免費)
http://museum.anpanman-acm.co.jp/tc/
http://www.kobe-anpanman.jp/
--------------------------------------------------
Instagram: wagyubmami
