當小朋友問啲關於「性」嘅問題，大人好多時都會覺得好尷尬，甚至紅都面晒咁。有媽媽喺forum度開post講有次發現「自己眼中一直天真無邪嘅仔仔」居然趁父母唔喺屋企時除褲睇AV，覺得好震撼。雖然大家都知人係有「性」嘅慾望，青少年一定會想探索呢個方面。但係咁樣兜口兜面撞破咗，又真係好尷尬，作為父母可以點化解？
首先大家最關心嘅一定係：仔仔幾歲先？小學生睇AV同中學生睇係兩回事嚟架喎。基本上小朋友去到十幾歲，對「性」感到好奇係絕對正常。不過媽媽眼中嘅仔仔當然係備受呵護嘅小朋友，第一次撞破呢件事，想像到係幾咁晴天霹靂呀！
有網民提議由爸爸出面同仔仔傾，趁機灌輸正確性知識，兩個男人講呢啲嘢冇咁老尷嘛。亦有網民認為當唔知好啦，再提只會令仔仔難堪。有機會講到相關話題時，先交流吓意見，教佢唔好亂嚟。其實即刻傾又好，伺機而行都好，最緊要心平氣和，等仔仔唔覺得自己做咗錯事，更加唔好做到好似窺探佢私隱咁，留返啲顏面畀大家。
而家接觸外界資訊咁方便，小學生睇過AV或有關「性」嘅影片都唔出奇。唔少家長認為學校嘅性教育唔夠完善，可能因為華人社會比較少將「性」呢個話題擺上檯面講。但其實「性」唔係罪惡，因唔了解而隨意進行性行為，咁先至大鑊嘛。冇人想日劇《14歲的媽媽》情節發生喺自己屋企，所以新時代嘅父母，唔應該再怕講性教育～
