今次同小JM去旅行已經叫做帶少咗好多野，無他嘅，因為吸收咗「第一次」嘅經驗，自自然然就會容易咗預備，再者就係因為小JM已經大咗，所以要預備嘅野自然會少啲。
雖然係帶少咗野，但媽媽我依舊會帶定少少媽媽奶以備不時之需。為咗Keep媽媽奶，我決定帶藍冰種同「尿片冰種」！因為藍冰種攜帶嘅數量會受到限制，所以自製「尿片冰種」就會好啲！（而且仲可以慳錢喔！簡直係一舉兩得！）
其實要整尿片冰種一啲都唔難，仲好容易整添！只要你有齊以下幾樣野就可以開始整架啦！
材料：
尿片……… 一條（小JM而家用緊中碼片片喔！）
儲奶袋…… 數個
較剪……… 一把
湯匙……… 一隻
水杯……… 一個
開水……… 適量
製作方法：
1. 先將尿片打開，備用。再預備開水並倒入杯中備用。
2. 將開水倒入尿片中直至尿片變成漲卜卜。
3. 當尿片變成漲卜卜後，就可預備較剪，以剪開尿片。
4. 先預備好奶袋及湯匙，再以較剪將尿片剪開，並取出吸水珠珠。
5. 剪開尿片後，用湯匙小心地將吸水珠盛起並置入儲奶袋中。
6. 將儲奶袋填滿並密封妥當即可完成。
7. 最後，只需要將尿片冰種冷藏於冰櫃內即可，待需要時取出便可使用。
尿片冰袋製作簡易又方便，而且價錢便宜，想幾時整都得。啱晒出街、出外旅行用，用完就算唔要都唔會浪費太多公錢。有需要嘅話，你地都可以試下整來用架！
