農曆新年又到喇，恭喜添咗丁嘅兄弟姊妹，又多一個逗利是嘅生力軍！
0歲
啱啱出世嘅BB，以及坐緊月嘅媽媽都不適宜外出。所以乜都唔使做，安坐家中等利是自己埋嚟喇！
1歲
BB開始牙牙學語，可能仲識行兩步路仔。媽媽願意的話可以帶佢參加拜年活動喇～仲未識講祝賀說話都唔緊要，教識佢拱拱手「恭喜恭喜」手勢，基本上冇人可是抵擋到呢個攻勢，只能乖乖奉上利是！
2歲
兩歲大家第一時間諗到啲乜？冇錯！就係大名鼎鼎嘅「trouble 2」！呢個時候小朋友鐘意唱反調，點先可以避免佢畀長輩嫌唔夠乖？家長不妨喺BB身上孭袋仔，等大家自動自覺追住佢塞利是入去喇！
3至4歲
再大少少，就可以教小朋友講返幾句祝賀說話啦！「恭喜發財」、「身體健康」同「龍馬精神」都走唔甩架啦～
5至6歲
到咗呢個年齡，小朋友讀緊幼稚園又就快升小，好可能會得到來自四方八面嘅「關心」！乖唔乖呀、叻唔叻呀、考邊間學校呀第幾名呀......唔想沒完沒了地被轟炸，不如教小朋友做一個小表演，唱下歌仔又好，扮下動物都好～為拜年助助興，畀小朋友鍛鍊下自信都唔錯！
講咗咁耐，其實就唔係想話大家發錢寒，要拎仔女賺利是錢嘅～過年都係想開開心心熱熱鬧鬧啫，利是只係長輩祝福小朋友嘅心意！老人家見到小朋友笑到見牙唔見眼，已經係一大樂事～所以逗到幾多都開心嘅！
喺呢度祝各位媽媽青春常駐，爸爸日進斗金，小朋友快高長大～恭喜恭喜～
