相信每位家長都一定有呃過仔女，有時係一啲善意嘅謊言，為咗令小朋友嗰刻舒服啲、好過啲，有時就係見到小朋友咁天真瀾漫，所以忍唔住講笑呃吓佢哋，睇吓佢哋有咩可愛嘅反應！討論區有人開帖，討論大家講過咩大話嚟呃細路，以下8句，各位JM可能都有講過！
8句家長講過嘅大話：
1. 「打針唔痛架！好似畀蚊針咁。」
2. 「吞咗西瓜核，肚仔會生西瓜樹。」
3. 「你唔乖，聖誕老人就唔送禮物畀你架喇！」
4. 「媽咪今年十幾歲。」
5. 「媽咪生肖屬猫。」
6. 「講大話會甩大牙！」
7. 「我同你班主任好friend架！」
8. M到驚魂
1. 「打針唔痛架！好似畀蚊針咁。」
樓主話有次去睇醫生，見到有個媽咪帶住3、4歲嘅囝囝，個媽咪一去到診所就問姑娘仲有冇流感針，問完就話要幫囝囝打，跟住就不停同阿仔講：「真係好好彩呀！剩得一支流感針咋，好珍貴架啲都冇呀，最後一支流感針都畀你打到！真係好好彩呀！要好好珍惜呀！」呢招都已經犀利，成功令小朋友信到十足十，不停點頭附和話：「真係好好彩呀。」然後個媽媽仲出埋十個有九個家長都用過嘅「絕招」氹囝囝：「打針唔痛架！好似畀蚊針咁架咋。」
樓主冇交代最後個小朋友咩反應，不過好大機會入去打針前都仲好安心，但到支針拮到肉嘅時候，內心可能會忍唔住悲鳴：「媽咪又話好似畀蚊針嘅？！」
所以有JM留言，呢招只能趁小朋友仲細個嘅時候用，到佢大個仔就唔用得喇！
2. 「吞咗西瓜核，肚仔會生西瓜樹。」
食西瓜唔小心吞咗啲核，點算好？！大家細個有冇試過有呢個疑惑？實不相瞞，Juicy媽細細個都曾經輕輕諗過一下，哈哈哈！有JM分享，有次阿女食咗粒西瓜核落肚，JM即刻扮到好緊張咁話：「慘喇！到時粒核會係肚入面發芽再生個大西瓜！」結果嚇到阿女喊晒口，如果Juicy媽細個我媽都咁同我講，可能我都會嚇到喊！
3. 「你唔乖，聖誕老人就唔送禮物畀你架喇！」
大家有冇用過呢招嚟氹細路？聖誕老人可能係好多小朋友嘅童年回憶，有JM試過趁聖誕假帶囡囡出埠旅行，囡囡去完返屋企後搵晒成屋都唔見禮物，就問媽媽點解聖誕老人冇嚟，JM一時口快答：「我哋去咗旅行，聖誕老人入唔到屋呀。」結果阿女喊得好淒涼，話出年一定唔可以聖誕去旅行！
4. 「媽咪今年十幾歲。」
喺小朋友嘅世界，歲數只係「大過佢」或者「細過佢」嘅分別，所以對佢哋嚟講，媽咪係25歲定係35歲其實都差唔多，總之就係大過佢。唔少JM都會趁住小朋友呢個咁純真可愛嘅階段乘機「報細數」：「我同我個仔講我1988年出世，到而家佢都仲信！」、「我同阿仔講媽媽年年廿五歲。」有個JM仲誇張：「佢細個嗰陣時問我：媽媽你幾多歲呀？我話『十幾㗎喇！』」哇！呢個數字好「狼死」，但，好值得參考！
5. 「媽咪生肖屬猫。」
唔知睇緊呢篇文章嘅你係咪貓奴呢？原來有唔少JM都試過呃小朋友，話自己生肖屬貓！有JM話本身好愛貓，於是當小朋友問佢生肖屬咩嘅時候，一時興起就話自己屬貓，初初小朋友都真係信到十足十，但到大啲之後睇咗本講十二生肖嘅書，先知原來媽媽呃佢！
6. 「講大話會甩大牙！」
「講大話，甩大牙，醫生話你冇刷牙。」相信大家細細個就聽過呢句說話，佢同《木偶奇遇記》入面講大話個鼻會變長嘅情節一樣，就算小朋友聽到都未必會信，但大家都總係忍唔住用佢嚟作為「警世良言」，用嚟勸小朋友唔好講大話。
7. 「我同你班主任好friend架！」
呢句真係超級好用！小朋友習慣咗爸爸媽媽嘅管教方式，有時會「走精面」試圖唔聽你支笛，但佢哋對學校老師總係有幾分敬畏，所以如果佢哋喺屋企扭計、唔肯做功課嘅時候，用「我同你班主任好friend」嚟撻吓佢都幾Work！
8. M到驚魂
「話說有次我去女廁，有個小妹妹大叫：媽媽流咗好多血啊……媽媽你係咪會死？」M到呢樣嘢，有時真係唔知點同太細嘅小朋友解釋，唔知大家通常會點樣回應小朋友嘅提問呢？有JM就試過呃阿女，話因為囡囡太曳所以激到阿媽流血，嚇到阿女驚驚豬！
仲有JM同小朋友講過「執你返嚟」等大話嚟呃佢哋，唔知大家又講過咩大話嚟呃細路呢？即刻Click入去一齊討論啦！
