記唔記得阿仔阿女啱啱出世嗰陣，總係對周圍嘅燈燈最有興趣？無論幾多歲嘅大人同小朋友，都總會被黑暗中嘅閃耀燈光吸引！今個冬天，中環海濱長廊將會有18個嚟自本地及海外嘅光影藝術作品，爸爸媽媽可以帶埋小朋友去影靚相，仲可以同作品互動！加埋皇后像廣場嘅特色聖誕樹同埋維港嘅加強版「幻彩詠香江」，絕對係非常值得去嘅親子好去處！
由11月29日開始至2019年2月24日，香港旅遊發展局舉辦全新大型活動 「閃躍維港燈影節」，一連串光影相關嘅展品陪住大家過個璀璨冬天！
1. 中環海濱長廊「國際燈光藝術展」（2018年11月29日至2019年2月24日）
雲集18個嚟自本地及海外嘅光影藝術作品，分別以「科技與通訊」、「童年夢想」同埋「連繫與浪漫」為主題，極具特色，家長同小朋友仲可以透過琴鍵改變大型裝置嘅燈光編排，或者騎喺搖搖馬上同燈光互動！
本地設計師作品
形狀係極有代表性嘅嘅香港特色招牌，將佢變做一層層重影，睇小朋友一齊影實好開心！
「童年夢想」主題
小朋友可以騎喺搖搖馬上同燈光互動，一定玩得好開心！
「連繫與浪漫」主題
「科技與通訊」主題
邊個話聖誕樹一定要係樹？發揮創意同想像力，方塊都可以變成聖誕樹！
2. 中環皇后像廣場19米高聖誕樹（2018年11月29日至2019年1月1日）
皇后像廣場呢棵高19米的嘅經典聖誕樹以冰雪為佈置主題，好有節日氣氛！
3. 尖沙咀加強版「幻彩詠香江」（11月29日、12月1、8、12、15、22及29日）
活動期間新增3幢大廈及1個景點參與匯演，令成個大型燈光音樂匯演更加震撼人心！
