聖誕節冇去過香港迪士尼樂園，點算做過聖誕呀！今年聖誕前夕，同往年一樣，指定動作當然要帶哥哥同芊芊到香港迪士尼樂園玩啦！因為有好多聖誕打卡位，可以記錄低家長同小朋友每個溫馨時刻。
不過大家又有冇諗過，除咗同好多迪士尼朋友影相之外，其實都可以用另一個角度去拍出你眼中的香港迪士尼樂園冬日聖誕。
入到嚟香港迪士尼樂園，當然大家都好想同小朋友影番一輯靚相，但係有陣時小朋友玩得太興奮，你叫佢望鏡頭仲難過叫佢考試攞100分。
不如就等我同大家分享一下幾個拍攝手法，等你可以同小朋友打到靚卡之餘，又可以將影相變做一個開心的遊戲時間。
我哋今日入到嚟樂園，就即刻去「小鎮大街火車站」搭香港迪士尼樂園鐵路的懷舊蒸汽火車，到達「幻想世界」後，第一站就到全新獨家既「夢想花園冬日市集」，呢度有唔同的聖誕裝飾可供打卡。
(一) 錯視效果
見到面前巨型聖誕裝飾，同小朋友花D心思，俾少少創意，用錯視方式去拍，依個聖誕球就好似放咗喺自己手上，再配合小朋友趣怪表情，好似要一嗒食咗個聖誕球咁。
番出去「美國小鎮大街」，再同全新高18米既聖誕樹影相。大家往往好自然就係走埋去棵聖誕樹底下影，走到去影嘅時侯先至發現捕捉不了整棵大樹。
其實可以用同樣方式跟聖誕樹合照，而且仲可以離遠一點較少人的地方去拍。看上去哥哥同芊芊真的好像要摘下聖誕樹上的星星。
再來一張攪笑的效果，媽咪跟哥哥就好像縮細咗企喺巨人芊芊的手上，再俾芊芊大風吹走!!
(二) 利用道具
對於小朋友嚟講，同佢哋影相要佢哋擺Pose，可能會好難(尤其是比較大個好似哥哥咁)，但係如果就咁企喺度望住鏡頭，又好似冇咩新意。
大家可以嘗試搵些道具協助，當哥哥同芊芊手上拎住個氣球，就自己會發揮創意，又或者會更放鬆去面對鏡頭，可能會做出些你意想不到的動作，製作出更好的拍攝效果。
(鏡頭中Minnie好似錫咗Mickey一啖)
突然覺得叫媽咪都入埋鏡，在「美國小鎮大街」的店舖，充滿聖誕裝飾物的廚窗前，拍出來效果仲有聖誕氣氛!
到咗晚上「聖誕飄雪時刻」，欣賞漫天飛雪之餘, 咁靚嘅場景用來打卡最適合不過。
我哋又番番黎「夢想花園冬日市集」，晚上的花園到處充滿聖誕裝飾和閃閃發亮的燈光，小朋友睇見都興奮。
(三) 捕捉最自然一面
好多時候我哋都會忽略咗小朋友最真的一面，其實當佢哋最自在地玩嘅時侯，用相機會拍下佢哋自然一面，比起叫佢哋企定定望鏡頭笑，來得更珍貴可愛。
(四) 趣怪表情動作
再加多2個小貼士，到香港迪士尼玩的時侯，盡不可能諗到咁多拍攝手法，還是總有些是叫小朋友來望住相機鏡頭去拍。
不過大家可以叫小朋友扮鬼臉做自己鍾意的動作，即使意外地背了鏡，反白眼，間中有些這樣的相片，其實都幾攪笑，還是可以接受的。
最後番到去晚上的「美國小鎮大街」，大街兩邊的店舖都有美輪美奐既聖誕裝飾同閃爍亮麗既燈飾，加上係「夢想成真聖誕樹亮燈禮」後點亮左既聖誕樹，仍是一個很好的打卡點。
(五) 低角度拍攝
很多時候覺得照片構圖沉悶，係因為我哋都常用大人的高度向下拍，所以睇得多都會有視覺疲勞，大家不妨嘗試用低角度拍攝，叫小朋友可以做些蹲下或跳起的動作，效果都唔錯呀！
臨離開前，哥哥覺得棵聖誕樹都好可以扮一頂帽戴在頭上，就自己提出要拍出下面呢張相。
影相不單止為咗打卡出Post，其實都可以藉住影相同小朋友開心玩樂。希望以上拍攝小貼士可以俾大家參考一下，拍出屬於你哋眼中的香港迪士尼樂園冬日聖誕。
(以上資料更新至文章當日)
Facebook專頁: 呀劍萬帥 kimfamilytravel
Blog網誌 : www.kimfamilytravel.com
