最近去咗位於上水新開嘅收費露營場，場地嘅特別之處在於係石地而非草地。
兩個女見到石地都好有新鮮感~
場地唔算好大，當日加埋我哋只有五家人露營。
而當日場地附近有個地盤，所以日間時間，有工程進行就有少少嘈...
第二朝大概8點，場地旁邊就有農夫開始工作。
日間時間，大大個太陽都係有少少熱。
所以，場地有空間我就俾佢地玩水彈。
玩到濕晒都唔怕，因為可以沖涼換衫。
今次場地提供木卡板，成個營可以起喺木卡板上面。
起好營，玩一陣食下茶點轉眼又黃昏啦~
兩位小姐都好享受戶外生活，冇冷氣、有小昆蟲飛，係最親近大自然嘅生活。
沖涼完，佢哋就可以食晚餐。
小朋友自己一張台，乖乖咁坐定定食晚餐。
咁我哋大人食咩呢?
老公點菜，要食辣雞煲。
雞我預先喺屋企洗乾淨，當日朝早先醃。
嚟到先炒熟隻雞整雞煲，都好方便快捷。
打邊爐，梗係要飲可樂啦!
仲要加埋檸檬，真係超爽!!
每次露營，通常我會諗當日下午茶、晚餐、第二朝早餐、生果餐。
今次和牛B喺出發前，佢主動同我講「我要學煎蛋做早餐」
我哋話佢知，會好大機會俾油彈到手，你唔怕痛?
佢起初有少少動搖，都怕油彈。但佢好認真，好堅持!
最後，都做得到，只係唔識反蛋。
我嘅早餐，加左幾滴豉油嘅煎蛋夾包~
妹妹就食咗麵包，仲要加一隻香蕉~
今次嚟到呢個場地，得著好多!
呢個場地，有好多昆蟲平日未曾見過，所以我哋又可以認識一下。
喺戶外，除咗動態活動都可以有靜態活動。
和牛B好鍾意畫畫，所以都有帶定畫簿嚟露營。
場地都有唔少心思、佈置嘅地方。
仲有吊床，仲有必影嘅車仔~
場內都有佈置少量太陽能燈飾，夜晚著燈真係好靚，好有Feel!
場地設施:
公眾嘅洗碗碟、洗食材、洗手地方。
洗手間 (坐廁)、旁邊有冰櫃、沐浴間。
【Chill Club梧桐 @ 上水】
https://www.instagram.com/chillclubcampinghk/
記得Follow埋我哋Facebook、MeWe同Instagram呀
和牛B & 和牛媽媽 YouTube Channel
