最近又去咗一個bookmark咗幾年都未去嘅放電好地方，今次約埋朋友一齊去放電放足一日!! 俾咗入場費，場內所有嘅設施都可以免費任玩 (除飛索體驗及充氣彈床外)。
天氣涼涼地，最適合去戶外、農莊玩。如果想去玩，記得先到佢哋網站預約再出發。因為佢哋不設walk-in到場玩樂㗎～馬上同大家分享有咩好嘢玩先！
滑草道、滑梯、沙池、攀石、鞦韆
嚟到一定會無限玩嘅滑草!! 呢到足足有成28米咁長～和牛b同妹妹玩完一次，馬上就再排隊再玩。而位於入場門口附近嘅滑梯，你可以選擇用車軚或者直接瀡嘅滑梯～滑梯設於沙池，旁邊仲有個小攀石。
手搖船、漂移車、單車
水池空間都算大，船都有唔同尺寸，而且家長可以同小朋友一齊乘坐手搖船，佢哋有分大船同細船。小朋友亦可以自己一架船仔，家長亦可以自己一架船仔㗎！入面有多款車可供選擇，當日我哋人唔多，所以差唔多全部款式都試玩晒！甩尾飄移話都冇咁易呀，不過都有機會炒車。
幼兒玩樂區
入面有玩單車、滑板車嘅地方，仲有唔同嘅兒童遊樂設施 (包括彈床)，仲有適合親子、朋友玩嘅乒乓球、桌球等。兒童區入面嘅車場，仲有滑板車提供。如果小朋友較年幼，家長可以帶佢哋嚟呢邊玩。兒童區入面仲有兩個適合幼兒嘅彈床！
羊公館
除咗玩樂設施之外，呢到仲有羊咩咩。當日我哋都買咗飼料($10/份)餵羊咩咩，場地職員仲話可以摸羊咩咩，佢話佢哋好乖唔咬人㗎。當然，家長都需要照顧同行小朋友啦！
必影打卡位、魚池、滑水梯
近入場門口，一入場就會見到呢間風車屋。而場內都有必濕身嘅滑水梯，雖然我哋當日有帶替換衣服，但當日天氣比較涼，我哋就冇玩到了。下次一定要挑戰，除咗替換衣服，仲要記得帶拖鞋呀！
飛索體驗 (**付費活動)
呢到最特別嘅設施就係飛索體驗!! 如果想玩，記得入場時要即刻去買定遊戲票啦！因為真心搶手，活動會喺下午進行。活動涉及高風險活動，購票前建議考量自身/小朋友體能後，再決定參加與否!!費用: $60/兩次 (同一名參加者)
和牛B今次係第一次挑戰飛索，喺朋輩影響之下。真係好唔同，如果只有佢自己，佢一定唔敢挑戰!!我見到成功挑戰飛索嘅佢，作為媽媽真係覺得佢好叻!!因為真係好需要勇氣，咁高、又快，其實都真係超級刺激!!
充氣彈床 (**付費活動)
彈床滑梯都好高，所以都幾刺激!有職員睇住小朋友玩，家長係唔可以進入彈床內。費用: $30/20分鐘
場內設施:
基本洗手間、洗手設施都有的。場地會為每位訪客預留一張台，可以放低手袋、行李 (注意! 貴重物品需要跟身)。場地亦歡迎訪客自備食物或於場內小賣部購買簡單小食 (有叮叮點心、杯麵、薯片、汽水等) 而我同朋友準備嘅午餐～有午餐，自然也準備了下午茶 (哈)～
育嬰室和吸煙區
比較簡陋，只有一張長台同埋幾張櫈。如果小朋友要瞓低換片，自己一定要攜帶換片墊舖台上面換。而場內禁止吸煙，所以場地都好細心。安排咗一個吸煙區，供需要人士使用。
【禾田喜山@沙頭角】
地址: 新界沙頭角塘肚村(沙頭角農莊直入)
