高鐵攪咗咁多年，終於話喺今個9月23日真式通車啦，上一次在石崗嗰邊同哥哥參與「高鐵列車開放日」睇過高鐵車廂，今次到「香港西九龍站開放日」我同芊芊去最新的西九龍站。
多謝婆婆俾咗兩張飛我同芊芊去拍拖，哈哈～
本來「飛沙封中線」單嘢真係睇到人都炆，不過既然拎咗我哋納稅人咁多錢去起嘅高鐵，阻又阻唔到，有得去玩番個晏晝就去睇吓啦！
就喺柯士甸站D2出口就可以直通去西九龍站搭高鐵。
今日星期日我哋預早半個鐘就到現場，可能有星期六的經驗，所以目測人流安排管制都幾好，基本上每等幾分鐘就可以再向前行一段。
呢個高鐵標誌又幾有型，有D似打機Feel(可能預埋做APP icon)，又用上橙色做主色調。
輕輕鬆鬆上扶手電梯去，一上去轉左穿過天橋就到西九龍站啦！
由窗口望過去對面的西九龍站，真係幾宏偉喎！
終於到達西九龍站L1層
整個西九龍站原來都分咗咁多層，我最期待係...「B1M餐廳」希望唔好剩係得麥噹噹啦。
好喜歡「高鐵」呢個色同埋字體，以後搭高鐵會唔會簡化講HSR呢？都真係好撓口。
人人都問我點解咁多人嘅地方都好似影到包場咁，其實呢張相嘅四邊都有人準備入鏡(就算知道你影緊D呀叔呀嬸都係會照喺你鏡頭前行過)，所以都係要靠快、狠、準。
站內好多設施都第一次見唔知係乜東東。
不過呢個站真係整得好靚，好有空間感！
去到票務大堂，大家可以選擇多種方式買車飛。
仲有多個位置俾巿民了解如何買車飛，同埋介紹一下高鐵多個車站 ...當然唔少得就係要講解埋一地兩檢呢個城巿熱話。(我嚟玩吓啫...暫時唔關注)
多個展板介紹高鐵。
仲有架高鐵模型打咭位。
又扮得幾似喎！
上一層原來有個綠化區，係最佳的西九龍景觀！
之後同芊芊仲玩咗幾個簡單攤位遊戲，拎咗幾份小禮品同高鐵紀念品就走lu...(因為越嚟越多大媽！)
希望通車當日唔好又甩轆。
Photo by Sony A7III FE 28mm F/2
想跟我去體驗其他活動，快D報名親子團，同埋留意專頁公佈詳情啦！
http://goo.gl/forms/CNZMEPoMIWkouK8o2
呀劍評分: 7分
呀劍評語: 對於個開放日的安排都算幾好，即使咁多人但係都唔會話排得太耐，唔會引起太大的混亂。另外呢個西九龍站真係幾靚幾大，好似個機場咁，仲有個餐廳！唔知幾時會有機會可以真實體驗一次呢？期待...期待...
(以上資料更新至文章當日)
Facebook專頁: 呀劍萬帥 kimfamilytravel
Blog網誌 : www.kimfamilytravel.com
