最期待的畫面出現了！我哋終於嚟到塘福露營車玩一晚啦！
呢個行程由2014年計劃到今天，講出嚟好似好誇張！但係真係好難Book架！
一直同負責人在facebook溝通，最後夾到於5月14日佛誕假期Book到兩架Medium Caravans
首先要成為會員，填好負責人email給你的registration form，及ATM過數$100會員費，選定你要的車輛後再ATM過全數(連入數紙whatsapp給他)！
如遇著天氣不穩定，大家只有一次改期Quota，但係需要於入營前兩星期(兩個星期前咁早都唔會預測到天氣係點，所以多數如期出發，聽天由命，碰碰運氣！！)
小型露營車 Small Caravan x 2
(可容納2-4成人，包括一張雙人床 及 一張可伸延梳化雙人床)
$1100(日至四；假期前夕除外)
$1800(五、六或假期前夕)
中型露營車 Medium Caravan x 4
(比小型露營車大30平方尺，同樣可容納2-4成人，包括一張雙人床 及 一張可伸延梳化雙人床)
$1200(日至四；假期前夕除外)
$2000(五、六或假期前夕)
大型露營車 Large Caravan x 2
(可容納4-6成人，包括四張單人床 及 一張可伸延梳化雙人床)
$1500(日至四；假期前夕除外)
$2500(五、六或假期前夕)
(A) 入住時間：下午四時，退車時間昱日二時 (2小型車，1中型車及1大型車)
(B) 入住時間：下午三時，退車時間昱日一時 (3中型車及1大型車)
*提提大家需要預備的物品
✦ 盥洗用品
✦ 毛巾拖鞋
✦ 調味料(如食用油、豉油、糖等)
✦ 風筒(營地只有3個，先到先得)
✦ BBQ用品(如炭、炭精、火機等；營地有二手燒烤叉及燒烤網)
我哋同朋友兩家人一早約喺東薈城食個PizzaHut，跟住就去Taste掃貨！買D水果、BBQ食物、零食等！營地附近有士多茶餐廳，所以我打算入到營先買炭！燒烤叉同網我決定環保D，用營內二手的！
攪掂之後就全員出發到11號巴士站搭車入塘福了…
今日係佛誕假期所以真係超多人…
11、11A 及 23號巴士都可以到塘福村，11A條龍短D但係每班巴士都疏D
我哋上咗11號巴士！行李就放咗喺巴士底
搭咗15-20分鐘就到達塘福村啦！一落車就會見到露營車個指示牌
斑馬線對面係「偉光士多」，大家有咩兵糧短缺都可以嚟呢度補給，夜晚10點先收檔
落車後一直行(唔駛過對面馬路)就會見到停車場，其實樓梯口就喺圖中旅遊巴車尾及停車場中間
之後就會再見到指示牌(不過好高同好細塊，差D見唔到)
有陣時停車場比較多車，可能會遮住咗條樓梯口！沿住樓梯行落去就會見到一大片草地
(唔好轉左)只要一直跟住石塊路行到尾就會見到間綠色鐵皮屋，嗰度就係露營車營地啦！
呢度有好多牛牛周圍食草，兩個小朋友都走埋去同牛牛影番張相，哥哥特別大膽走到咁近！
塘福露營車個招牌都甩哂色
繞過個招牌行幾步就有個木欄，入到去就係營地範圍！
營地成(反轉)"L"字型，三架中型車在一邊，另外三架大型車同兩架小型車併列一起
門口旁邊有間太陽能屋，接受到嘅能量作供應晚上嘅電燈用
太陽能屋裡面發現到D二手燒烤叉，不過有好多都幾污糟，我搵咗幾支乾淨的去用
我哋最早Check-in，所以一個人都冇！只係得負責人叔叔喺度，佢先帶我哋參觀露營車同講解所有設備
每一架露營車外都有木枱櫈同埋燒烤爐
(由我們的中型露營車位置影出去)
小朋友都唔得閒關心車裡面有咩，第一時間跑去玩
呢條瀡滑梯都好刺激！真係瀡極唔厭
負責人叔叔話我哋呢架車係全營地最新嘅，雖然係中型車，但係比另外兩架中型車更闊敞，而且好多設備都係較先進(真係感恩！)
下圖係露營車入口左手邊的梳化，拉出支架可以變成一張雙人床！足足有6呎夠哂2個大男人瞓，而且車內好多櫃同暗格，包你一定夠位放嘢！
車內嘅窗全部有蚊網同遮光簾任意調交，望出窗外嘅樹景真係好舒服好寫意！
望上去仲有個天窗，如果好天夜晚可以坐喺度睇星星！(不過我哋呢晚就見得唔太多)
室內全部傢私都係用木製造，感覺充滿太自然氣息！下圖見有收音機同喇叭，聲音收得好清！仲有CD播放器(但係我覺得今時今日俾個USB頭駁電話播歌仲好囉)
門口的右手邊就係一張雙人床同洗手間，同樣有一個天窗同埋多個櫃
枕頭全係成人用，如果有小朋友的話就只好唔瞓枕頭，如果唔係就要自己DIY或者自備了！
洗手間都好簡單乾淨！不過室內所有水都係由揼機控制，所以水力唔係想像中咁大，同時開住水嚨頭仲會分薄咗水力，但係都足夠應付洗澡洗碗！其一不太理想係開水時揼機會發出摩打聲音有D嘈！
厠所會有一卷全新厠紙同埋上手用剩的！如果真係驚自己當晚一卷都唔夠用，就最好預先問負責人拎多卷後備，因為佢七點就放工架啦！
門口正前方就係廚房，所有餐具飯煲都準備齊全，針板菜刀都有，足夠應付日常煮食
唯獨是大家一定要記得預備食用油，如果唔係就煮唔到嘢食㗎啦！(大家可以到士多買或者用牛油代替)
明火煮食爐有3個，電爐有1個，但係火力唔係太猛(舉例，煲水要大約10分鐘先滾)
盆下面就係雪櫃同焗爐，雪櫃內設有冰格，但係同樣雪嘢唔夠凍！如果雪肉類飲品要用冰格先夠凍，冰格係唔會雪到結冰！不過如果大家接受程度較高的話，其實雪下層都足夠的！
門口側邊有微波爐同電視
其實入營之前一直都有擔心露營車經營咗兩年幾，架車一定有損耗又污糟，但係估唔到架車保養得好新淨(其他大型及小型車就唔清楚)
嚟番張全家幅先！希望今次旅程大家都玩得開開心心
我哋Settle down之後就帶齊裝備落去塘福海灘玩囉，其實本身我哋打定輸數天氣會好差，因為天文台一早預測呢兩日都會間中有驟雨(點知兩日都熱到黐線)，所以都冇帶到泳衣泳褲！
由營地行去塘福海灘都係5分鐘，當你見到個海灘即刻有四個字出咗嚟…「水清沙幼」
呢度周不時有D牛牛周圍行
玩沙lu……玩水lu……
三隻小白豬玩完之後都曬到黑哂，番去露營車沖番個涼準備晚餐
喺我哋架車出邊啱啱好有個水喉可以望佢哋沖沖身
小朋友永遠係最幸福嘅，你睇佢哋一沖完就出番去玩，留低番D大人喺度準備晚餐
差唔多六點我喺士多買咗兩包炭同埋火機炭精，喺呢度買果然貴好多，成$48一包炭，真係自殺都唔夠錢！
轉眼間就入黑啦，幾個媽咪就負責喺廚房煮意粉！
我都起咗個爐，一支公喺出面燒雞翼
小朋友舒舒服服咁坐喺車裡面開餐
佢哋兩個食完意粉出嚟幫我一齊燒雞翼！好感動噢
咁悠閒咁燒嘢食真係好耐都未試過！攪掂哂小朋友瞓覺，我哋終於鬆一口氣
我坐喺車裡面望住火爐裡個火，真係覺得大自然好正，有機會真係要多同小朋友親親大自然
朋友望我影的一張相! (看住他倆燒住嘢食的背影, 心裡就响起一句「你們倆將來要彼此幫助呀)
又到第二朝，在晴朗的一天出發！兩個小朋友起身又攪攪震喇！
每架露營車外面都有一個掠衫架，幸好今朝天氣特別好，尋日濕哂嘅衫好快就乾番哂！
我一早起身就出去起爐燒埋最後一包雞扒，做蜜糖雞扒炭燒麵包做早餐！
媽咪就炒蛋同埋沖豆漿俾大家飲！
仲有一樣嘢幾得意唔記得講，就係露營車個門口係可以分開上下開，可以只可上半門！
當小朋友喺出面玩緊，然後媽咪伸個頭出嚟大嗌「食早餐啦！」個種感覺好有日劇Feel
望住呢個景真係有D唔捨得今日就要Check-out！我哋食完早餐之後就再去多次海灘玩
然後就番嚟沖涼，執好行裝離開露營車啦！最後搭番11號巴士出番去東薈城食Lunch
Photo by CANON 5D Mark III, Len | EF 24-70mm f2.8L USM
呀劍評分: 10分
呀劍評語:
一個好好的體驗之旅，同小朋友享受大自然，從互相幫助中促進親子關係！同陽光玩遊戲有一個特點，就係一定小朋友之間唔會爭玩具，因為大自然係無限同免費人人有份！同露營及渡假屋宿營嘅分別就係休息時侯舒服D同埋唔會好似喺渡假屋咁困喺間屋度嘛！
Caravans Hong Kong 簡介
位於大嶼山塘福村對出的塘福露營車營，設有七架從英國進口的露營車，分為小（2-4人）、中（2-4人）、大（4-6人）三個大小，每輛露營車均備有冷氣、雪櫃、煮食爐、微波爐、洗手間及浴室等，此外，營地亦設有燒烤爐，可供BBQ之用。由於塘福露營車營遠離市區，參加者可以一邊觀星，一邊進食，十分寫意，是香港小有的郊外親子好去處。
地址
香港大嶼山嶼南道270號塘福村
交通
東涌乘搭 11, 11A 或 23 號巴士至塘福站下車 (車程約 20 分鐘)，下車後步行 5 分鐘
電話
6296 8220/ 6371 1211
網頁
(以上資料更新至文章當日)
