「十二隻恐龍去野餐，齊乘坐旅遊車出發了，路上唱歌兒快快樂樂，Sing "I am on my way"」，係就係搭旅遊巴喇！不過我哋今次唔係去野餐，係去camp呀！
上次介紹過保良局北潭涌渡假營，今次一於更上一層樓，嘗試一下傳聞中環境好、風景正嘅賽馬會西貢戶外訓練營啦！一切就從旅遊巴到達營地開始！每個小朋友都精神奕奕，預備開展我哋嘅兩日一夜渡假之旅喇！
大人、小朋友都大包小包仲拖埋喼，準備十足！
嘩！呢度環境真係正喎！有山、有水，果然係非同凡響~
班小朋友已經好興奮喇！其實興奮嘅又點止小朋友丫！大人心情都好高漲呀！我哋一行39人，浩浩蕩蕩。將會入住2人房、8人房同埋高級豪華嘅28人房。一定好熱鬧啫！
泳池背後就係渡假屋區喇！一幢幢西班牙別墅，成個view都好靚呀！
經過多幢別墅之後，終於到達我哋嘅28人複式客房，房間光猛舒適，第一感覺已經正到秘！
裝修和傢俱以白+綠色為主，既簡潔又乾淨企理。
小朋友已經展開搜索行動，擒高擒低四處參觀喇！
帶大家睇埋洗手間啦！上層同下層都各有一間。內裡有多格淋浴間、廁所和洗手盆，可容納多人同時間使用。有啲似公眾泳池嘅更衣室呀！
晴朗已經揀好自己張床，仲開始鋪梗床單添！
有咩嘢開心得過可以同三五知己玩足兩日一夜丫！圍埋一齊玩囉喂！
坐響梳化，望住咁正嘅風景，簡直係人生一大樂事呀！好舒服喔！呢度嘅渡假屋都坐擁無敵大海景，真係住多幾日都願呀！
小朋友突然急急腳落晒嚟樓下嘅？原來有電視睇，唔怪之得啦！見到佢哋一齊睇到咔咔笑，真係好得意呀！
似乎大家都好滿意間屋。咁就好喇！不如出去行下囉！經過泳池，發現部份團友已經換晒泳裝落水玩喇！
嘩！可以邊賞風景邊暢泳，大家心情十分舒暢，環境真係正到呢？
我哋去咗海旁玩bubble，你吹我拍，好熱鬧！晴朗真係好鍾意玩bubble，玩到啲小朋友都番晒屋，佢哋仲好有精力咁玩梗……
返渡假屋途中，經過cafe，原來環境都好正喎！可以響度tea一tea~
除咗有小食賣之外，仲有冷熱飲品同食物提供，唔怕會餓親啦！
夕陽無限好，只是近黃昏。唔覺唔覺已經玩到日落西下~
晴晴掃落去欄杆上嘅竹筒時，響起清脆悅耳嘅聲音，好有大自然feel呀！
就快天黑，要快啲為我哋嘅晚餐做準備先得！在爸爸們分工合作之下，可以開始BBQ晚會喇！gogogo~
晴朗都嚟幫手燒叉呀！(冇搞搞震)唔該晒喎！
呢啲就係我哋嘅豐富晚餐喇！6大盤，好壯觀！
吹住海風，欣賞住周圍優美嘅環境，胃口都會特別好呀！
好肚餓...我哋唔客氣喇！
第一次燒嘢食唔駛身水身汗，環境真係好好~
大家都不停食，食到夠鐘都仲未捨得走呀！
食飽飽！梳洗過後，又係卡通片時間喇！
仲大玩紙牌遊戲添！晴朗第一次接觸uno，覺得幾新奇有趣，仲玩到唔願瞓添！
一晚瞓到大天光，好舒服喔~ 晨早起床，清新開朗~ 太陽伯伯好溫暖！
一大清早，女孩子就玩吸印遊戲，精力充沛！
晴晴都被呢一片海景所吸引~
早餐時間到！齊齊到canteen擦餐飽囉喂！有腸仔、炒蛋、方包、榨菜肉絲米，仲有一大壺柯華田添！
大家都食飽飽，下一個活動係咩呀？小朋友都齊集晒響我哋間屋嘅？原來係一同來繪畫囉！渡假屋突然化身為海景畫室，係小朋友發揮無限創意嘅時間喇！
小朋友都畫得好投入，好開心呀！
課堂主題係獅子，呢幅係其中一位小朋友嘅作品，係咪好可愛呢？
認真學習過後，小朋友又再encore uno遊戲~ uno既富有挑戰性又好玩，唔怪得之咁受小朋友歡迎啦！
大船經過後，海上泛去一排一排嘅波浪，此情此景，好悠閒寫意呀！
大家估唔估到我哋嚟梗會進行咩嘢活動？飛鳥？白鶴？花朵？蝴蝶？冇錯！就係同蝴蝶有關㗎喇！XD
一齊去上蝴蝶酥製作班囉喂！小朋友都好留心聽導師講解，期間仲有互動添！
原來做法好簡單㗎咋！先將糖灑在已解凍嘅酥皮上面，灑完一邊反轉灑另一邊，鍾意食甜啲嘅就灑多啲~
然後幫塊酥皮做按摩，均勻鋪平糖粒~
酥皮向內摺四份一，再向內摺多一次到中間位置，另一邊都係咁做~
摺好之後，就變成兩邊復合成六摺嘅長條形喇！
用手輕輕按壓，再放入雪櫃10分鐘~
從雪櫃取出，切開約1/2吋闊嘅幼條~
切好晒之後，可以入焗爐焗約20分鐘，直至金黃色就得喇！
呢啲係上一班嘅完成品，係咪好吸引呢？
晴朗都開始動手做喇！奸爸嗲！
等梗出爐嘅時候係最期待㗎！
課堂上好多嘢都要靠自己，整完蝴蝶酥，大家都夾手夾腳清理枱面。完成晒之後亦要負責洗碗，係訓練自理嘅好機會呀！
嘩！全部都出晒爐lu~ 大成功！Yeah!!!
晴朗都好有滿足感呀！仲問可唔可以即刻食添！
自己整的確係特別好味呀！
食飽過後，又玩過，做小朋友真開心！
我哋仲去咗禮品店玩夾蛋機添！小禮物人人有份，永不落空~
午餐時間到！今次order嘅係西式餐，有粟米忌廉湯、茄汁燴豬扒、芝士白汁什豆雞皇、炒雜蔬、脆炸薯條同埋肉醬意粉~
優美嘅環境、美味嘅食物，一切都好美好呀！(攝自晴朗爸爸，見唔見到我哋呢？)
臨走嘅時候，發現原來最上層有一個平台，風景仲靚呀！
小朋友繼續你追我逐，精力無界限~
大人就把握最後機會，盡覽呢一片湖光山色！
西貢戶外訓練營係我哋去過咁多個camp site，風景、環境最正嘅一個。靚景之下，心情都特別舒暢！Cafe同Canteen啲嘢食都煮得好好味！最緊要小朋友啱食嘛！唔需要用好多錢去住酒店，都可以渡過一個咁悠閒舒適嘅假期。真係唔錯喎！不過如果可以住多幾日就好喇！我哋原本想玩埋DIY pizza同埋果jam，但因為啲班已經一早full晒！想玩DIY嘅朋友就要預早book定喇！入camp之前仲以為只報蝴蝶酥一個班，冇咩活動可能會悶添！但原來響camp site自由活動都用咗好多時間，報一個班都夠喇！好彩當初冇位啫！大人同小朋友都各自搵到適合自己嘅活動，玩得好開心！呢度真係一個本地親子渡假嘅好地方呀！
賽馬會西貢戶外訓練營
地址：西貢大網仔路DD256地段
電話：27922727
網址：http://otc.hkfyg.org.hk/page.aspx?corpname=otc&i=3822
營地申請：按此
