葵涌有一隱世公園依山而建，環境十分之優美。一齊嚟揭開佢神秘嘅一面囉！
公園位於青山公路之下，大連排工廠區後方。我哋從青山公路開始，由上而下咁樣行落去啦！(冇咁辛苦嘛！)
中葵涌公園入口在此，到喇！到喇！
沿住自然散步徑漫步囉！公園樹木長得十分之茂密，只能夠從樹木嘅空隙望到少許風景。
重頭戲到喇！兒童遊樂場就係晴朗行咗咁耐嘅推動力。
公園人流稀少，晴朗可以獨霸整個遊樂場玩。去囉！去囉！gogogo~
玩完遊樂場，又要玩埋其他健身設施，但你哋好似唔夠腳長喎！
經過小橋流水，望下有咩嘢睇先。山水一直往下流，可以考慮響呢度整番檔山水豆腐花喎！
玩完一大輪，預備離開公園喇！
唔經唔覺，就已經行到落大連排工廠區lu。
睇睇指示牌，原來仲有滾軸溜冰場，下次可以帶埋鞋嚟呢度玩喎！
紅線為我哋所行嘅路線，原來行咗一小部分咋！下次嚟要行埋另一邊先得！
中葵涌公園面積大、環境自然優美，所以我哋都好鍾意去呢度玩。由青山公路入口開始，行一段約10-15分鐘嘅山路就到達兒童遊樂場。大人可以過下行山癮，小朋友又可以在公園放電，簡直係一舉兩得呀！不過夏天嚟就要做好防蚊措施喇！始終公園靠住山而起，樹木又多，自然多昆蟲㗎啦！如果唔嫌棄佢哋啲設施較舊的話，呢度都不失為一個小朋友放電嘅好地方㗎！
唔記得介紹一下公園嘅前身添！其實以前係牧牛場嚟！估計七十年代初結業後，就賣咗畀政府用嚟起公園喇！公園內放置咗一尊栩栩如生嘅牛雕塑做裝飾。今次冇影到添！攞番兩年前嘅相同大家分享下先。伏在地上的牛雕塑，就好似真嘅一樣呀！
大家有時間都帶小朋友嚟玩下啦！玩完仲可以步行至附近嘅葵涌廣場或新都會廣場嘆番個tea添呀！
中葵涌公園
公園開放時間：全日24小時
查詢電話：2424 7201
交通：可乘搭巴士31B, 32, 36B, 38, 42C在「葵涌業成街」站下車，然後向山上步行約兩分鐘便到達公園位於青山公路之入口
網址：www.lcsd.gov.hk/tc/parks/ckcp/index.html
