媽媽們成日講澳門科學館好正又抵玩，但網上資料唔係好多，一直都好想親身去感受下點正法。機會終於嚟喇！順便介紹埋畀想去玩嘅媽媽啦！
我哋由威尼斯人搭shuttle去到澳門金沙落車，一直向海邊行就會到達科學館。沿途會經過一玻璃橋，過完橋，左手邊見到晒整座科學館，正常會見到銀灰色嘅外牆，但工程進行中，變咗綠色。
由金沙步行約15分鐘，科學館三面環海，風景一流呀！
科學館有兩間餐飲店，一間coffee shop，另一間就係個view勁正嘅麥記。入場參觀之前，晴朗被親子互動區所吸引，先在此放電。又屋仔、又滑梯咁，睇怕有排都未捨得入場參觀喇！
玩飽遊樂場，入場參觀lu。晴朗對機械人好有興趣，停落嚟好專心咁聽梗佢介紹注意事項，唔通佢哋以為係真人嚟嘅？
太空科學廳
晴朗操控梗火箭發射……three~ two~ one~ GO!!!
仲可以一嘗駕駛太空船添！
現場可以模擬一下在月球漫步的感覺同有裝展畀小朋友學習漩渦力。
兒童樂園廳
又係考手眼協調嘅時候喇！
人工手動操控每一個機關，將啲木球成功運送至最高點，然後木球就會碌番落嚟㗎喇！
搖身一變，變身成為地盤工人。
朗朗正努力起樓，咁應該可以同人講：「呢層樓我有份起㗎！」
入場人士一律要穿著安全衣物，見到佢哋3個著成咁，實在太似地盤工人喇！
我趕住運送材料呀！
兒童科學廳
可以名正言順咁玩水，幾得意！小朋友響呢度一定會覺得好新奇有趣架！
科學快車廳
好大部火車！模擬到真嘅一樣！
請緊握扶手！入到呢間房，所有窗都播放梗澳門嘅街景，就模擬到好似搭梗巴士一樣呀！
機械人廳
可以同機械人鬥智捉象棋，有無信心贏先？
聲學廳
響呢度可以好好運用一下我哋雙耳朵，朗朗好搞笑囉！
地球廳
介紹一啲同我哋息息相機嘅地球小百科。
仲可以感受一下滑雪添！
遺傳學廳
將啲細胞組織放番落細胞內適合嘅位置，幾有趣味性。
環保廳
用腳嚟砌puzzle你又試過未？
模擬在澳門實景街道駕駛。
揸第二部車，揸完一部又一部，過足癮啦！
運動健康廳
同電腦打乒乓波。
仲可以練習射擊添喎！
運動競技廳
又煲、又鑊咁，煮梗咩呀？
食物科學
介紹不同食物嘅知識。
臨走順便入去禮品店逛逛，店內售賣好多同科學有關嘅貨品，好似機械人、飛行科學、錯覺科學、磁力科學、針孔相機、壓花藝術、鋁合金積木、環保科學系列等等。
澳門科學館共有14個展覽廳，展出超過450件互動展品，主題包括兒童、科技、環境科學同埋生活等4個主要元素。啲展品幾得意同富有趣味性，可以引導小朋友享受探索科學嘅樂趣。媽媽們果然無介紹錯！科學館仲有提供免費wifi同免費電子儲物櫃，我哋大包細包咁，放晒落locker先入場參觀。玩得輕鬆好多呀！
我哋本來預3小時在科學館玩樂，但七除八扣之下，得番兩小時。仲要睇埋電影，太貪心喇！其實3D電影同香港太空館所放映嘅效果差不多，如果唔夠時間都可以省略。我哋最主要行咗朗朗感興趣嘅太空科學廳，同埋響兒童樂園廳都玩咗好耐。之後就急步完成埋其他十幾個展廳，唔係影咗好多相，要留待大家去親身體驗喇！下次嚟，一定要預留充足啲時間先得。實行要慢慢玩，慢慢探索大半天呀！
澳門科學館
開放時間：星期一至星期日 10:00-18:00 (逢星期四及農曆年除夕休館，公眾假期照常開放)
票價：$25 (18歲以上至65歲以下人士)，$15 (18歲或以下、65歲或以上人士)，2歲以下幼童免費
地址：澳門孫逸仙大馬路澳門科學館
電話：(853) 2888 0822
網址：www.msc.org.mo
