「綠野游蹤」係新濠影滙以熱帶森林河流為主題嘅戶外游泳池，我哋坐摩天輪由高處望下見到時已經覺得好吸引喇！喜愛玩水嘅晴朗又點會錯過呀？
泳池位於3樓平台，響宏偉嘅8字摩天輪下暢泳，真係另有一番風味呀！
左手邊嘅係「游吧」，游水游到肚餓就可以去呢度食啲嘢，補充番下體力。
而右邊係進入熱帶森林河流嘅入口。
響呢個大池度玩下先啦！yeah~
響大池玩飽不如過去專為兒童而設嘅嬉水區「童樂池」度玩啦！路過洗手間，設計夠晒特別，好似真係去咗原始森林咁呀！
二話不說就已經急步上咗嚟呢度，有條巨型急流滑梯，正呀！
比大家親身感受一下啦！去片~
瀡完直梯，不如試埋彎梯啦！好似仲正喎！*o*
附近有個噴水池都好受小朋友歡迎~ 晴朗已經玩到進入咗忘我境界喇！XD
響童樂池玩夠，不如去熱帶森林河流玩下囉！快啲攞番個大水泡啦！
坐住水泡，隨水漂流，穿越高低橋樑，途經瀑布急流，好刺激呀！
晴晴同我坐一個大水泡，一齊去歷險lu喂！
嘩！我哋即將進入「巨口鱷魚潭」喇！鱷魚張開大口，就好似想吞咗我哋落肚咁呀！
尾隨嘅朗朗都好enjoy咁喎！
見到「游吧」，亦即係代表河流旅程差唔多到達尾聲喇！又漂流番嚟大池，可以繼續玩水lu~~
響人造沙灘玩沙都一樣咁開心！
泳池旁設有一個個鵝蛋形嘅休憇處，真係好有渡假feel呀！可以將隨身物品放響度，亦可以坐低嘆下小食，咁先係人生嘛！
鍾意嘅亦可到「游吧」外嘆番餐，環境好悠美，簡直樂而忘返~
場內仲有另一個泳池，不過撞正進行定期清潔暫停開放，要留待大家發掘箇中樂趣喇！
「綠野游蹤」既有游水區，亦有漂浮河道，仲有一個專為小朋友而設嘅童樂池，真係啱晒大人同小朋友嚟玩呀！池水比較淺，比小朋友去玩都覺得放心啲啦！不過要提一提大家，童樂池嘅滑梯只係for 12歲或以下嘅小朋友玩，晴朗媽媽初時唔知sir咗一次好爽呀！如果同去年澳門大倉之旅嘅天浪淘園比較，呢度係屬於迷你版本。不過相信酒店主打嘅並唔係「綠野游蹤」，所以如果入住酒店當係一個遊樂設施都OK呀！咁又玩咗一個快樂悠閒嘅下午，係時候要去下一個節目，返上房沐浴梳洗先喇！拜拜~~
綠野游蹤
位置：澳門路氹城金光大道新濠影匯3樓
網址：www.studiocity-macau.com/tc/accommodation#spa28
