突然挑起條癮想去BBQ添！但係帶住小朋友要搵合適嘅地方唔係咁容易。早前見天水圍開咗一個地方有嘢畀小朋友玩，玩完又可以燒埋嘢食。好似好吸引喎！一於向北走走，深入探索一下呢個親子場地係咪咁正先！大家跟貼啲，跟住嚟啦！
嘩！超級無敵大彈床呀！小朋友雙眼即時發晒光！彈床設有唔同嘅障礙物，不過點撞都唔怕啦！即管去馬！
小朋友們二話不說已經上晒去三連滑梯度喇！朗朗同啲同學瀡得勁high，情緒十分之高漲呀！從高空望落去張超級無敵大彈床度，果真大！夠晒地方畀小朋友跑跑跳跳，唔怪之得佢哋玩到唔捨得離開！
晴晴未夠膽瀡大滑梯，唔緊要！瀡住個細嘅先啦！
仲有條大笨象滑梯似乎仲好玩喎！去囉！去囉！
喪跳完彈床跟住過嚟玩電動車啦！晴晴揀咗部綠色嘅吉普車，揸住佢去越野囉！ 玩完一圈，晴晴覺得吉普車速度太快，換咗架minions小綿羊，好cute呀！呢架仲襯女孩子啦！不過真係好……慢.……車道闊落，響呢度駕駛難度唔會好高，不過唔知點解分隔車道啲柱好多都畀人撞爛晒……因為個個都無牌駕駛？XD
另一邊廂，同學仔去咗打war game, ACTION!!!埋伏、換彈、研究對策、出擊！玩得不亦樂乎！
玩完車車，不如去玩下攤位遊戲囉！
呢度啲職員好好，無論玩邊個攤位，玩完總會有啲小獎品畀番小朋友。不論大小，小朋友收到一樣咁開心！玩完又可以揀禮物喇！仲有好多其他攤位，我哋都玩唔晒咁多。除咗攤位遊戲之外，仲有一啲做小手工嘅counter，都幾受小朋友歡迎㗎！
五臟廟鐘聲響起，係時候到隔離嘅花田韓式燒烤度醫醫肚喇！環境唔錯，對住條河bbq，環境優美，心情特別舒暢。
韓式頭盤包括牛柳粒、羊架、豬串骨、三文魚鰭，四選一。既然我哋有7張券，就試晒咁多款啦！呵呵！仲有其他食物可以任揀任食㗎！
職員教我哋放張紙上去個爐度，然後放食物上去燒，咁啲食物就無咁容易燶㗎喇！韓燒有個好處，好快又燒好一碟食物，大家都唔駛再餓住等囉！
遠望對面都係燒烤場範圍，地方好大。
小山羊見我哋玩得咁開心，都要嚟玩埋一份呀！
好攰好攰！好耐未試過由朝玩到晚喇！響超級無敵大彈床度追啲細路追度我氣咳，雖然好攰，但玩得好開心呀！其實花花同花田係兩間唔同嘅店嚟！花花提供彈床、電動車、war game、攤位遊戲等親子活動，而花田就提供韓式同港式燒烤。如果大家好似我哋咁貪心，想一次過滿足晒玩同食嘅慾望的話，去到花花入場嘅時候直接購買套票便可。詳情如下：
玩樂 + 韓燒
星期六、日、假日及假日前夕，任玩2小時跳彈床滑梯、動力車及1次war game+4小時韓式燒烤：
2位成人+1位小童(120cm或以上) $538
1位成人+1位小童(120cm或以上) $388
購買上述套票後如有需要，可加購以下優惠：
- 額外每位小童(120cm或以上) $248
- 額外每位成人 $168
- 120cm以下的小童無須付燒烤費，只需購買遊戲手帶$144/位
玩樂 + 港燒
星期六、日、假日及假日前夕，任玩2小時跳彈床滑梯、動力車及1次war game+4小時港式燒烤：
2位成人+1位小童(120cm或以上) $488
1位成人+1位小童(120cm或以上) $358
購買上述套餐後如有需要，可加購以下優惠：
- 額外每位小童(120cm或以上) $218
- 額外每位成人 $138
- 120cm以下的小童無須付燒烤費，只需購買遊戲手帶$144/位
* 以上2小時任玩 + 4小時BBQ優惠套票需最少購買2大1小或1大1小優惠套票1套，才可以優惠價加購額外成人、小童或120cm以下之小童遊戲手帶優惠
* 如家庭當中沒有120cm或以上小童，不適合使用優惠套票。可先到花田購買燒烤券，然後到花花出示燒烤券可享9折購買入場券優惠：
- 花花2小時任玩彈床滑梯、動力車及1次war game：每位小童正價$160，9折後$144
- 花花全日任玩彈床滑梯、動力車及war game：每位小童正價$280，9折後$252
以上套票費用未包括攤位遊戲及其他設施收費，如果想玩埋就要另外畀錢喇！我哋揀韓燒嘅原因係快靚正，快快燒起啲食物就可以招呼啲細路，大人又唔駛捱肚餓，一舉兩得！最欣賞係頭盤嘅三文魚鰭，燒到啲魚油出晒嚟！好香好好味！而雞扒塊皮燒到脆卜卜，牛扒肉質都唔錯呀！大家好快就已經食到飽一飽。
有幾點要留意嘅係，由於燒烤場無吸手印記認，出入最好袋住張bbq券以備職員檢查。仲有呀！如果坐響河邊嘅話，要小心隨身物品誤落水中。晴朗媽媽摷袋嘅時候聽到「dum」一聲先發覺跌咗啲嘢落水。經檢查後，好彩只係一個唔值錢嘅「尿袋」。如果係銀包或者電話就大件事喇！哈哈！大家要注意喇！呢度有得畀小朋友放電，又可以畀大人過下bbq癮，真係一個唔錯嘅好地方。有機會都想再encore呀！
花花世界兒童樂園
地址：天水圍天慈路馮家圍30號B
facebook：www.facebook.com/flowerplayground
花田韓式燒烤場
地址：香港元朗天水圍馮家圍30號
電話：9227 0728
facebook：www.facebook.com/Flowerbbq
