我同和牛b都好鍾意飲湯，不過我平時要返工，放假又鍾意帶住和牛B出去玩，所以都無時間去煲湯。
同我一樣都鍾意飲湯，領展喺5月期間舉行「盛湯廚房」，進行義賣湯水活動，而捐出款項全數撥捐惜食堂。
只有四個領展商場先有舉行呢個限定活動。每個活動日期都會喺唔同地點進行，樂富廣場、黃大仙中心、鯉魚門廣場、屯門蝴蝶街市。
呢個活動係由國際名廚王凱傑（Jason Wang），將領展街市商戶回收嘅食物，再設計咗四款獨家靚湯。鼓勵市民「飲啖湯見吓對方」，同時仲宣揚惜食文化。
只要捐出$10予惜食堂，即可以換領一張換湯券、有湯飲之餘仲可以影返張靚相留念。
四款靚湯都有特別嘅意思，神級Fusion湯（黃芽白葫蘆瓜冬菇濃湯）、助「辣媽」清熱除煩惱嘅下火蛋花湯（菠菜豆腐蛋花湯）、讓「仙氣媽媽」繼續美麗示人嘅抗氧化仙氣養顏湯（焗南瓜木瓜紅蘿蔔濃湯），仲有增強「佛系媽媽」免疫力嘅全素佛系番茄湯（番茄青瓜湯）。
事不而遲，馬上分享我嘅活動流程啦~
捐錢後，就可以馬上揀湯，工作人員就會俾換領券及貼紙俾我。
我揀咗「下火蛋花湯」，再去用換領券拎湯，新鮮滾熱辣嘅湯，馬上送到!!
拎咗湯之後，仲可以去Topping區，加配料上去。配料有成8款咁多，有芫荽、 櫻花蝦乾、炸蒜、有色爆谷、南瓜籽、ABC 字母餅、黑胡椒、心型及星型麵包多士，仲有樂富廣場限定嘅食用花。
和牛B幫我裝飾完之後，成個湯錦上添花咗好多。
再將工作人員俾我嘅貼紙貼埋喺個湯蓋到就完成~
湯碗外其實仲有地方可以寫上心意句子，送俾你想送嘅人。
完成之後，仲可以去「潮拍長輩圖」影相留念添呀~
有四個相框可以揀~和牛B揀咗「記得唔好空肚食早餐唷!」~
張相即時打印出嚟，仲可以二維碼(QR Code)下載原相。
講返最重要嘅嘢，就係湯嘅味道。
我揀嘅係「下火蛋花湯」，超墨綠色嘅湯底，味道好香好濃，好濃嘅菠菜。
味道一啲都唔咸同埋唔係味精湯，所以飲完都好想再飲多碗呀!!
