MegaBox入面嘅IKEA有個唔錯嘅兒童樂園，小朋友可以入去玩，爸爸媽媽就可以輕鬆咁睇傢俱。
其實呢個好玩地方都開咗有一大段時間，成日都好想帶小小豬入去玩返轉，不過次次都人山人海冇機會玩到，今日終於係冇預期之下，小小豬可以入去玩個飽啦！
食完晚餐行過IKEA嘅兒童樂園，見到人流唔太多，所以就八卦行過去睇吓仲有冇位。
出奇地今日真係冇乜人，當然即刻去拎完張籌先啦！拎埋張入場表格填！
之後我地行一轉IKEA，就可以入去玩啦！
雖然小小豬都係第一次入去玩，不過之前經過都有係啲窗口位望過入去，所以根本上佢都知道入面有咩玩。所以今次一入去，小小豬當然係直接衝去波波池啦！
見小小豬係入面玩得咁開心，我就同大肥豬繼續行IKEA。行左十五分鐘再返嚟望吓隻爛玩豬。點知唔見咗佢，原來小小豬已經改左地頭，行左出去玩佢呢期勁鐘意嘅火車呀！
一有車玩佢就變得沉迷了，所以之後啲時間全程都玩火車！
其實除左波波池同火車之外，入面仲有煮飯仔，同有啲珠珠遊戲，所以種類都幾多，男仔女仔都一樣啱呀！
話咁快四十五分鐘就到，小朋友們就可以著鞋仔等家長接啦！
因為到咗可以接小朋友時間，大肥豬爸爸去左洗手間，我就諗住先去接小小豬先。因為我冇接小朋友回條，就連小小豬係入面不停叫「媽咪...媽咪」，負責姐姐都唔俾我接，最後都係要等大肥豬嚟到，出示張回條先可以帶小小豬走啦！
哈哈哈...呢樣要讚一讚，認紙唔認人做法真係唔錯，真令人好放心交低小朋友入去玩呀！
呢個百厭小小豬係入面玩得不知幾開心，一行出嚟就問我幾時可以再嚟玩，真係俾佢笑死。
可能因為係免費關係，平日我地星期六日嚟睇都話要等四個鐘先可以入去玩，今日我地都算係好好彩，所以都唔敢講定幾時可以再嚟，只可以同小小豬講：等下一次好運日，我地就可以再嚟玩啦！
