有好多好嘢食喺我面前，但我唔識珍惜…人就係咁衰架喇，喺香港個陣又話無嘢好食選擇少，去完外地旅行，就算食盡幾多當地嘅佳餚，都唔及香港街邊美食！搞到個心囉囉攣…放低個喼就要趕住去食好嘢！
討論區網民都一樣，去完旅行硬係有一樣嘢係好想食…我睇完個Post就做咗個簡單統計，搵出「外遊最掛住嘅五大港式美食」！
第五位：點心
嘆一盅兩件係每個星期指定動作，加上食點心最重要係食個陣充滿港味嘅茶樓氣氛，就算喺外地食到點心，都食唔返一樣風味！港式點心一定榜上有名啦！
第四位：雲吞麪
大大粒嘅蝦加上豬肉同薄薄嘅雲吞皮，造就永恆不滅嘅港式經典雲吞！仲有夠爽口嘅麪底，真係去到邊都食唔到架！落單仲要叫「細蓉」先最有feel～～
第三位：燒味飯
我朋友曾經同我講：「叉燒咪同Ribs咁上下！」我就輕輕回佢一句：「你簡直口出狂言！」蜜汁叉燒外層香甜，咬落甜啖啖肉，令人去旅行都心思思掛住，唔係《食神》點會有「黯然銷魂飯」！
第二位：凍檸茶
港式檸茶，唔係一般英式紅茶加兩片檸檬可以比擬。港式檸茶個茶膽好重要，茶清而唔會苦澀，好有層次架！就算去外地叫杯 ”Iced Lemon Tea＂都一定唔同味！
第一位：奶茶
「外遊最掛住嘅五大令人囉囉攣港式美食」第一位——係奶茶！同我心水一樣！喺外地要飲奶茶唔難，好似港人最鍾意去外遊嘅日本咁，入到便利店有好多唔同選擇，就算用上北海道極濃牛奶，加上高級紅茶，點都唔夠茶餐廳奶茶個種茶香奶滑，第一位絕對當之無愧！
嗱，雖然我去旅行會掛住港式美食啊…但唔代表我唔去旅行架！唔去又點知自己最掛住邊樣港式美食呢？
其他網民仲有好多心水，睇下有冇你有冇共鳴：http://bit.ly/2IqGKag
