有時天氣唔好無得去街街玩，都可以喺屋企開心親子一番！ 因為大肥豬買咗盒考平衡嘅益智遊戲畀小小豬，既可親子活動又可以做小訓練！真係刺激又好玩呀！
呢個小遊戲就係TOPPLE，大肥豬係啲細細間嘅玩具店見到，最好就係個價錢都只係三十幾蚊，所以就買咗返嚟等我哋一齊玩啦！
呢個遊戲玩法主要就係輪流將啲小棋放上個平衡架上面，個平衡架只有一個接觸點，所以係好考平衡、定力同耐性，因為一大力啲啲，個平衡架就會咗搖右擺，好易跌哂啲棋落枱面就輸會咗喇！
其實最正確嘅玩法就係擲骰仔，擲到幾多號就放回所屬嘅層數。
不過小小豬都始終仲係細，仲未會好好掌握到個力度同埋個平衡，為免加添個難度，所以暫時我哋嘅玩法就係三個人隨意咁輪住放上去個平衡架上面。
開頭小小豬都唔太願意玩，不過經我哋一輪教導同示範，小小豬開始明白個玩法，所以都好用心咁慢慢將啲棋放上去喇！
今日我哋玩咗幾次，小小豬表現一次比一次好，啲平衡、定力同耐性都有少少進步，因為玩咗幾次之後，真係見到小小豬係好慢慢咁輕輕手放上平衡架，都總算係明白咗呢個遊戲嘅重點。
當然小小豬都總係有失敗嘅時候，不過我覺得失敗咗都係另一個好好嘅訓練。因為小小豬嘅性格都係啲唔認輸、任何事都要做第一嘅小朋友，所以我都希望透過呢個遊戲，令小小豬明白所有事都唔一定要第一，輸咗唔重要，唔洗發脾氣，最重要係玩嘅過程開心，同埋下次再努力就可以得到勝利。
其實，我覺得要令小小豬明白呢個道理比訓練佢啲平衡仲要困難，不過我哋都會繼續Keep住努力教，希望令小小豬明白呢個道理。
我覺得小朋友要有個想贏嘅好勝心係好，不過始終唔會次次都係你贏，唔可以一有少少錯就影響到情緒。所以我哋而家主要都係培養小小豬呢一方面為大前提，希望小小豬接受到輸贏嘅結果，贏咗嘅唔好驕傲，繼續保持一個平常心；輸咗嘅都唔洗唔開心，只要下次再努力，一定會嬴返。
呢啲心態唔好話小朋友，就連我哋大人有時都未必做到。不過我覺得可以趁而家係小朋友學習黃金期，希望慢慢可以培養出呢個好心態，因為識得輸...才會得到最後嘅勝利！
