每逢過年，又要封利是，又要買禮盒，一個新年都要洗唔少錢架，精明的JM當然想慳得一蚊得一蚊啦。但送禮呢啲咁體面嘅嘢，你估話慳就慳到咩。
不過，要慳錢都唔係無辦法嘅。年廿八洗邋遢，有JM就喺討論區分享一啲又平又天然嘅清潔方法，幾十蚊就可以抹到個廚房廁所乾乾淨淨！
不少JM都不約而同大推用梳打粉去油，清潔廚房一流！齊睇佢哋有咩計仔：
1. 用梳打粉通下渠：10分鐘左右加熱水撞落去（用刷清潔一下），用水喉冲多陣會聽到咕嚕咕嚕聲即係通左！一個月一次呢個動作家居細菌都小啲㗎，仲記得當年沙士細菌經U渠入屋！所以一定唔可以懶
2. 洗抽油煙機：開一盤熱水整溶d梳打粉，將拆得既配件就放入梳打粉d水中浸下佢，抹走晒d油之後就用水洗乾淨，其他唔拆得既部位就用d熱梳打水抹走d油，再用清水抹乾淨....
3. 省不鏽煲：輕輕濕下水，灑啲梳打粉喺煲身，當沙粉咁用， 用普通百潔布省下，一陣d黑色漬無哂！又可以洗走茶杯啲茶漬，水煲啲水漬
除咗梳打粉，原來麵粉都一樣得！將麵粉灑喺油上，自然會變粉狀，掃走就可以，好容易去走9成9油漬，最後攞清潔劑再洗下就掂，完全無油膩感覺。
去水漬就可以牙膏，用到支牙膏擠唔到，就可以剪開佢，將剩低嘅用來擦鏡、水龍頭都得。
筆者睇完都好心動，即刻買返盒梳打粉同麵粉試試：
1. 用梳打粉去油
梳打粉係天然清潔劑，用熱水以1:1比例沖開，再用百潔布／抹布抹，又或者拎啲廚房用具去浸，唔使一陣就已經無晒啲油漬，抹抽氣扇、省不鏽煲一流！用梳打粉洗碗，可以去茶漬變返白！不過用落有啲「嗱」手，記得帶手套啊。筆者喺超市買，$14.5一盒，平過買清潔劑！
清潔前：
清潔後：
2. 麵粉去油
同梳打粉有異曲同工之妙，用熱水以1:1比例沖開抹，好快去到油，洗碗都可以！除此之外，都可以將麵粉灑在油污上，麵粉會將油污吸附，變成一粒粒或一塊塊，最後用濕布抹返就得。
清潔前：
清潔後：
3. 牙膏去水漬、去污漬
擠一點牙膏，用牙刷刷水龍頭，等一陣再用水沖返乾淨，就會發現水龍頭好似新的一樣。如發現衣物沾上油污、汗漬，都可以擠啲牙膏搓洗。
清潔前：
擠啲牙膏，用牙刷刷到水龍頭起泡：
清潔後：
以上方法確實係既便宜又實用啊，大家不妨喺屋企試吓！
