睇冰雕...嘉年華 一次過玩盡大棠冬季樂園

其實之前幾次嘅冰雕展我都已經好想去睇，不過每次一提出老公就會一大堆理由以掩飾佢怕凍嘅弱點。

 

今年大棠舉行嘅冬季樂園又嚟，我當然都好想去玩一轉，所以今次我就出黃牌，小小豬一出依個愛豬號爸爸就冇得拒絕，所以我地就三口子嚟玩返轉啦~

由今日開始至到4月17號元朗大棠已化身成「冬季樂園」，既可以係零下5度欣賞冰雕嘅冰雪館，仲有好幾個遊樂設施，絕對係大放電嘅好時刻呀~

小小豬咁貪玩，我就當然係買$180任玩套票，可以入冰雪館參觀一次，同埋玩室外遊戲各一次，之後仲可以去參觀埋大棠有機生態園。任玩套票係平日仲可以任玩室外遊戲無限次，咁平日嚟就應該仲抵玩呀~

不過要留意有部分遊戲設施係有高度限制，最起碼都要110CM以上先可以玩呀~

嚟到我地就當然要即刻去冰雪館睇靚靚冰雕先啦~

未嚟之前都上網做過功課，冰雪館入面係零下5度，所以我都帶定幾件羽絨保暖。不過原來真係唔可以睇少入面嘅溫度，著晒衫都覺得勁凍，所以最後我地都著埋大會提供嘅雪褸先夠~

一入到冰雪館真係睇到我同小小豬嘩嘩聲，唔同主題嘅冰雕，再加上顏色嘅幻彩燈光，真係勁靚呀！不過入場時職員哥哥提過千其唔可以用手接觸啲冰雕，如果唔係就會焯傷，所以小小豬全程都好乖乖，眼看手勿動…哈哈哈~

火車控第一時間就當然去望火車啦~

仲有齊齊入去住冰屋添~

當然唔少得玩冰梯，第一條旋轉冰梯都真係幾刺激，不過因為安全問題，要120CM先可以玩得，所以小小豬就睇住我玩啦~

另一條冰梯同樣都係要120CM先可以玩得，不過小朋友就可以坐係家長身上抱住玩，齊齊感受滑梯嘅威力呀~

仲有一條聖誕老人村，可以坐雪車添~

仲有一個冰極酒吧，如果依個時候可以歎多杯飲品就正啦~

唔覺唔覺我地係冰雪館都逗留了大半個鐘，其實我同小小豬都唔想走，好想玩多幾轉滑梯，不過怕凍老公都已經盡左佢最大努力，所以我地只好SAY GOODBYE TO冰雪館啦！

不過我地玩嘅活動當然係唔會停，因為我地轉戰室外遊戲區繼續玩。

首先就當然係滿足一下車控豬，去小型賽車城玩轉車。佢地分左兩個場，小小豬依啲小朋友就去細場玩，有齊晒跑道路牌，見小小豬都玩得好投入~

另一個場就俾就大個小小嘅小朋友同埋成年人玩~

我覺得依個設計都唔錯，大人同小朋友都可以齊齊玩嘛~

相信依條極速滑梯都一定唔會陌生，因為之前小小豬都玩過，足足有五層樓嘅高度，真係刺激都冇朋友。上次玩小小豬都可以大膽地自己滑落嚟，不過今次就由於安全問題，120CM以上先可以自己玩，所以唯有俾DADDY抱住咁滑落嚟啦~

Helter Skelter旋轉滑梯可以話係小小豬至愛，當然啦….因為佢夠110CM，可以自己滑，佢滑完落嚟都不知幾興奮呀~

仲有一個冬日水晶球，類似一個小型彈床，但其實係一個影相位。不過有得彈小小豬又點會放過，我又不甘示弱，齊齊嚟個親子彈先~

玩到攰就入去冬日市集休息一下，飲飲食食補充一下體力先~

其實仲有啲攤位遊戲，大約$20-$30就可以玩到，其實啲遊戲都唔太難玩，不過一向玩遊戲唔叻嘅我地都贏唔到獎品啦~

估唔到我地係冬季樂園都玩左接近三個幾鐘，原本入場卷所包嘅大棠有機生態園我地都去唔到，真係有點可惜，聽場內姐姐講入面有好多小動物同植物睇，不過因為我地要趕返公公屋企做節，所以唯有下次再入嚟玩過啦！

想了解更多活動詳情同埋交通安排，可以CLICK入冬季樂園官方網站，入面都有詳細介紹，最重要係有假日免費穿梭巴士時間安排呀！

Website：http://winterwonderland.asia/

Facebook：https://www.facebook.com/WinterWonderlandAsia/