上回講到原來喺郵輪上面有咁多美食選擇，而且各大食府都係搭架Lift就到，唔使狂摷地圖，更加唔使攀山涉水，對於一家大細呢個組合，確係幾盞鬼；之但係，雖則話好食啫，但如果只係得食，又好似照顧唔到各人需要喎！ヾ(´ε`ヾ)
既然介紹得畀大家，當然唔止得好食咁單一啦；郵輪嘅設施大致上都能滿足各年齡層需要，最重要嘅係郵輪話大唔大，話細唔細；大嘅程度，絕對夠你玩之餘，玩到攰又隨時可以返房小睡片刻，更加唔使為沖奶換片孭住個沉重嘅百寶袋，絕對係媽媽喜訊！
玩樂篇
「喺茫茫大海上面，除咗曬下太陽仲有咩好做？莫非真係要去船頭扮《鐵達尼》？」
室外活動
除咗游水同水上活動滑梯樂園之外，原來喺船上面仲有好多室外活動，當中包括乒乓球、小型哥爾夫球，仲有平日唔係成日會玩到嘅攀石，其中令我最驚喜嘅係，原來郵輪上面居然有個室外籃球場，鍾意運動嘅爸爸們，就唔怕屈喺船上面無伸展機會啦！
另外，船入面嘅麻雀耍樂區、卡啦OK設備同多款按摩水療服務，都係令女士們心心眼嘅項目；除此之外，郵輪亦安排咗好多唔同類型嘅Workshop，大家可以選擇同太婆做下小手工，又或者陪佢「活到老，學到老」，齊齊參加海上太極學堂！
至於小朋友嘅活動更加係數之不盡，星夢郵輪特別為2至12歲嘅小朋友設計「小小夢想家」計劃，同思進電腦有限公司、EVI兒童教育資訊網以及Lego Education合作，將STEAM課程融入計劃當中，小朋友可以透過計劃變身小船長之外，仲可以學習簡單航海知識。
透過各類益智活動，啟發小朋友對科學、科技、工程、藝術及數學方面嘅興趣，提升創造力；仲有副船長親身教學！
完成「小小夢想家」海上學堂所有課程後，小朋友齊齊參加畢業禮，領授榮譽證書以及特別版紀念禮品一份。
不得不提呢個提供幼兒暫托服務嘅熊貓夢想天地，裡面有圖書、玩具、電視遊戲等不同設備，適合各年齡層小朋友，夢想天地由多位老師管理，家長們可以稍稍放低小朋友，爭取一點個人空間，仲可以比小朋友體驗獨立自主！
雖然話可以完全放低定咩，但由於我哋從來都無試過比佢「無父母式自由活動」，所以其實一直都喺門口睇實佢，初初都有擔心，但睇嚟我哋嘅擔心完全係多餘，不過見到佢原來可以自己坐定定畫畫，真係好奇妙！
郵輪仲顧及到一家大細同年青一輩嘅需要，設有電子遊樂中心同VR遊戲，絕對係包羅萬有！
特備節目篇
「唱下K、游下水，好似都係普通嘢，稍稍唔夠特別兼唔似旅遊喎！」
郵輪假期嘅節奏比較慢，唔需要特別安排行程，屬於另類旅遊體驗，但咁樣講，唔等於佢只係得個hea字，除咗室內同室外嘅娛樂設施，郵輪仲會邀請好多嚟自世界各地嘅歌星舉行音樂會，或者上演專業又精彩嘅舞台劇，絕對令人拍案叫絕！
「世界夢號」舞台製作: 甜蜜哈瓦那 夏灣拿之戀，由古巴歌手以熱情奔放嘅舞蹈，訴說段段浪漫愛情故事。
載歌載舞嘅場面，無論大人同小朋友都睇得一樣開心！
郵輪仲會不定期為旅客帶來獨有驚喜，早前就同全球最暢銷棋盤遊戲《大富翁》合作，炮製全球首個海上真人版《大富翁》，而調皮嘅大富翁先生仲會著上船長衫，走到船倉同大家打成一遍！
安全篇
「話晒都身處大海之上，會唔會好容易暈船浪咖？搖多兩搖容乜易跌落海！」
其實整個旅程，只係偶意感覺到輕微晃動，亦見唔到有人因為暈船浪而嘔吐大作，反而返到地面，就會有少少腳步浮浮嘅「暈地浪」感覺，不過當然好快就適應落嚟啦。
定咩表現肉緊，原來開船喇！如果唔係睇到窗外燈光，都完全唔發現添！
欄河設計非常穩固，而且有一定高度，小朋友大可以喺成人陪同下欣賞一望無際嘅大海。
番外篇
星夢郵輪仲相當貼心♥，為定咩小朋友準備小禮物同兒童用嘅清潔護理產品。
要定咩乖乖噤坐喺度被吹頭，梗係出動玩樂套裝好時候！
係香噴噴嘅蜜糖味！
星期日嘅早上，食埋個早餐就落船，Say Bye-bye啦！٩(๑•̀ω•́๑)۶
